មណ្ឌលគិរី៖ លោក ជាក់ ម៉េងហ៊ាង អភិបាលរងខេត្តមណ្ឌលគិរី ថ្លែងក្នុងកិច្ចប្រជុំប្រចាំឆមាសទី២ របស់គណៈកម្មាធិការបណ្តុះបណ្តាលខេត្តមណ្ឌលគិរី ដោយមានការចូលរួមពីថ្នាក់ដឹកនាំមន្ទីរ/អង្គភាពជុំវិញខេត្ត អាជ្ញាធរក្រុង/ស្រុក ឃុំ សង្កាត់ និងអង្គការដៃគូរជាច្រើននាក់ ដែលប្រព្រឹត្តទៅនៅសាលប្រជុំសាលាខេត្តមណ្ឌលគិរី នាថ្ងៃទី១១ ខែធ្នូ ឆ្នាំ២០២៣។
លោក ជាក់ ម៉េងហ៊ាង អភិបាលរងខេត្ត បន្ថែមថា ដើម្បីចូលរួមសម្រេចឱ្យបានចក្ខុវិស័យរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត របស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា ក្នុងការអភិវឌ្ឍធនធានមនុស្សជាពិសេសការកសាងបាននូវកម្លាំងពលកម្មជំនាញ ដែលមានជំនាញវិជ្ជាជីវៈ ច្បាស់លាស់ គំនិតច្នៃប្រឌិត និងភាពប្រកួតប្រជែងខ្ពស់ និងដើម្បីធានាថា “យុវជនម្នាក់មានជំនាញមួយយ៉ាងតិច ប្រចាំជីវិត”។
ក៏ដូចជាយុទ្ធសាស្ត្របញ្ចកោណដំណាក់កាលទី ១ បញ្ចកោណទី១មុំទី២ «ការបណ្តុះបណ្តាលជំនាញ និងបច្ចេកទេស» ដែលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីបានដាក់ឱ្យអនុវត្តកាលពីថ្ងៃទី១៤ ខែវិច្ឆិកា ឆ្នាំ២០២៣ នៅសណ្ឋាគាររេស៊ីដង់សុខាភ្នំពេញ ។ ដែលធ្វើការបណ្តុះបណ្តាលជំនាញបច្ចេកទេស និងវិជ្ជាជីវៈ ចំនួន១.៥លាននាក់ ដល់យុវជនមកពីគ្រួសារក្រីក្រ និងគ្រួសារងាយរងគ្រោះដោយទទួលបានប្រាក់ឧបត្ថម្ភ ២៨ម៉ឺន រៀលក្នុងមួយខែរយៈពេល ៤ខែ តាមរយៈអនុសាសន៍ រៀនឱ្យចប់ ឱ្យចេះ ឱ្យមានការងារធ្វើ។
លោក អភិបាលរងខេត្ត បានឱ្យដឹងទៀតថា ជាការឆ្លើយតបនឹងកាអភិវឌ្ឍន៍ជាមួយរាជរដ្ឋាភិបាល និងខេត្ត តាមរយៈគោលនយោបាលទាំងនេះក្នុងនាម ថ្នាក់ដឹកនាំខេត្ត គណៈកម្មាធិការបណ្តុះបណ្តាលខេត្ត ព្រមទាំងក្រុមការងារលេខាធិការដ្ឋានបាននឹងកំពុងធ្វើ សកម្មភាពដំណើរឆ្ពោះទៅមុខបង្កើនគំនិតផ្តួចផ្តើមថ្មីៗ ដើម្បីពន្លឿនកិច្ចការផ្សព្វផ្សាយនិងជ្រើសរើសយុវជនមកចូល រៀននៅTVETដល់មូលដ្ឋានភូមិស្រុកដែលចាំបាច់បំផុតដើម្បីធ្វើឲ្យវិស័យ TVET កាន់តែឆ្លើយតបទៅនឹងតម្រូវការ ទីផ្សារនៅក្នុងខេត្ត និងក្រៅខេត្ត ទាំងបច្ចុប្បន្ន និងអនាគត។
លោក កោ គឹមអាន នាយកមជ្ឈមណ្ឌលបណ្ដុះបណ្ដាលវិជ្ជាជីវៈខេត្ត បានឱ្យដឹងថា សម្រាប់ឆ្នាំសិក្សា ២០២២-២០២៣នេះ មានសិស្សនិស្សិតសរុបចំនួន ៣៤៤នាក់ ស្រី១៦២នាក់ ហើយសិស្សដែលជាជនជាតិដើមភាគតិចមានចំនួន ១៨២នាក់ បានរៀនមុខជំនាញផ្សេងៗតាមរយៈការបណ្ដុះបណ្ដាលរបស់មជ្ឈមណ្ឌល។
លោក បន្ថែមថា មជ្ឈមណ្ឌលបណ្ដុះបណ្ដាលវិជ្ជាជីវៈខេត្ត មានមុខជំនាញបច្ចេកទេសចំនួន១២ ក្នុងនោះមាន បច្ចេកទេសកែច្នៃសាប៊ូលាងចាន បច្ចេកទេសកែច្នៃធ្វើស្ពៃជ្រក់ សេវាកម្មកុំព្យួទ័រ ការផ្សារអគ្គិសនី ការថែទាំនិងជួសជុលម៉ូតូ សំអាងការ ព័ត៌មានវិទ្យា អគ្គិសនី និងការដំឡើងបណ្តាញអគ្គិសនីក្នុងអគារ ៣កម្រិត ចាប់ពីកម្រិតC1ដល់C3៕
