កម្មភាពអូសនិងដឹកជញ្ជូនលៀសតំបន់បឹងទន្លេសាប នៅស្រុកក្រគរ នាំចេញទៅប្រទេសវៀតណាម រាប់រយតោនក្នុង១ថ្ងៃៗ ប្រជាពលរដ្ឋនៅតំបន់មាត់កំពុងដរតំបន់ចុងទឹកស្ថិត នៅភូមិទី-៤ ឃុំកំពង់លួង ស្រុកក្រគរ ខេត្តពោធិ៍សាត់ បានឲ្យដឹងថា នៅក្នុងមូលដ្ឋានរបស់ពួកគាត់ ជារៀងរាល់ល្ងាច និងជាពិសេសយប់ៗ ក្រុមឈ្មួញដឹកជញ្ជូនលៀសតាមការណូតធំៗយ៉ាងគគ្រឹកគគ្រេង ដើម្បីច្រកចូលការុងលើកឡើងរថយន្តចំណុះ២តោនកន្លះ និង៥តោន រួចដឹកបន្តយកទៅឡើងរថយន្តប្រភេទវ៉េអងយីឌុប(ភ្លៅ៥)ដើម្បីនាំទៅក្រៅប្រទេសវៀតណាម ដែលគេយកកែច្នៃធ្វើជាចំណីត្រីឬបង្កង។ ករណីនេះគឺបានបញ្ហាបំផ្លិចបំផ្លាញពូជមច្ឆជាតិនិងធនធានជីវៈចម្រុះយ៉ាងមហន្ដរាយ។
គេសង្កេតឃើញមន្ត្រីស្ថាប័នជំនាញពាក់ព័ន្ធ ចុះអប់រំនិងរហូតឈានដល់ពិន័យជាអន្តរកាលផងដែរ ប៉ុន្តែដូចជាពុំមានគ្មានប្រសិទ្ធភាពទាល់តែសោះ។ ពោលគេនៅតែឃើញរថយន្តដឹកលៀស ចេញពីចំណុចខាងលើនេះជារៀងរាល់ថ្ងៃ។ មន្ត្រីមានសមត្ថកិច្ចរដ្ឋបាលជលផលដែលជាអ្នកកាន់ច្បាប់ ក៏ឃើញតែដើរចុះដើរឡើង ពេញតំបន់កំពង់ហ្លួង ស្រុកក្រគរ ខេត្តពោធិ៍សាត់ នោះដែរ។ អ្នកខ្លះនិយាយថា ដែលការពិន័យអន្តរកាលដដែលៗដោយមិនអនុវត្តច្បាប់បែបនេះ ស្មើនឹងធ្វើការពិន័យយកតែលុយឬយ៉ាងណា? ព្រោះដោយសារតែគេឃើញក្រុមឈ្មួញនៅតែធ្វើសកម្មភាពបានជារៀងរាល់ថ្ងៃដដែល។
ប្រភពរាយការណ៍ពីប្រជាពលរដ្ឋរស់នៅតំបន់កំពង់លួងនោះឲ្យដឹងទៀតថា សកម្មភាពក្រុមកែច្នៃធ្វើឈ្នាងអូសលៀស អូសទាញដោយកំលាំងម៉ាស៊ីន រួចដឹកជញ្ជូនបន្តទៅចែកចាយនៅមាត់កំពុងដរទីតាំងខាងលើ គឺបានធ្វើសកម្មភាពនៅលើផ្ទៃទឹកបឹងទន្លេសាប ក្នុងខេត្តជាប់បឹងទន្លេសាប ដូចជា ខេត្តពោធិ៍សាត់, ខេត្តសៀមរាប និងខេត្តកំពង់ធំ។ល។ រួចដឹកជញ្ជូនបន្តតាមកាណូតធំៗមកចំណុច ភូមិទី-៤ ឃុំកំពង់លួង ស្រុកក្រគរ ខេត្តពោធិ៍សាត់។ គេនិយាយត្រឹមតែជ្រុង១នៃបឹងទន្លេសាប សំរាប់តែខេត្តពោធិ៍សាត់ ១ប៉ុណ្ណោះ រួចហើយច្រកលៀស ចូលការុងលើកដាក់រថយន្តចំណុះ ២តោនកន្លះ និង៥ តោន ដើម្បីដឹកជញ្ជូនចេញទៅប្រទេសវៀតណាម តាមច្រកក្អមសំណរ ខេត្តព្រៃវែង។
ប្រភពបានឲ្យដឹងថា ក្រុមឈ្មួញធំជាងគេនៅទីកន្លែងនោះត្រូវបានគេស្គាល់ឈ្មោះ ចែនី និងតាម៉ុង ។ ឈ្មួញទាំងពីរនាក់នេះធ្វើសកម្មភាពដឹកជញ្ជូនផលនេសាទលៀសរាប់រយតោនក្នុងមួយថ្ងៃៗចេញពីតំបន់កំពង់លួងស្រុកក្រគរ ខេត្តពោធិ៍សាត់ ទៅប្រទេសវៀតណាម។
យោងតាមច្បាប់ស្ដីពីជលផល ពាក់ព័ន្ធឧបករណ៍ឈ្នាងអូសលៀសដោយកំលាំងម៉ាស៊ីន និងដឹកជញ្ជូនខាងលើ មាត្រា ៩៨ ជាប្រភេទបទល្មើសថ្នាក់ទី-១ ត្រូវជាប់ពន្ធនាគារ ពី៣ឆ្នាំទៅ៥ឆ្នាំ កត្តាអ្វីដែលធ្ងន់ធ្ងរ ឧបករណ៍ឈ្នាងអូសលៀសដោយកំលាំងម៉ាស៊ីននេះ បំផ្លិចបំផ្លាញ ធន ធានមច្ឆជាតិ ធនធានជលផល និងប្រព័ន្ធអេកូឡូស៊ី ។ ការទិញលក់ឬដឹកជញ្ជូនផលិតផល ជលផល ដែលបានមកពីការធ្វើនេសាទខុសច្បាប់ គឺត្រូវផ្ដន្ទាទោសតាមមាត្រា ១០១ ដែលជាប្រភេទបទល្មើសជលផលទី-៣ ត្រូវដាក់ពន្ធនាគារពី១ខែទៅ១ឆ្នាំ ឬពិន័យជាប្រាក់ពី ១ លានរៀលទៅ ៥ លានរៀល វត្ថុតាងទាំងអស់ត្រូវរឹបអូសជាសម្បត្តិរដ្ឋ ឬបំផ្លាញចោល ដែលមាននៅក្នុងប្រការទី១៥ នៃមាត្រា ១០១ ។
ពាក់ព័ន្ធ័ការធ្វើនេសាទសង្ស័យខុសច្បាប់ស្ដីពីជលផលខាងលើ លោក យូ វិចិត្រ នាយសង្កាត់រដ្ឋបាលជលផលក្រគរ និងជានាយរងផ្នែករដ្ឋបាលជលផលក្រគរបានឲ្យ ដឹងបែបមិនទទួលខុសត្រូវ និងបានបាញ់របាយការណ៍ ១ នាព្រឹកថ្ងៃពុក ១៤រោច ខែមគសិរ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១០ ខែមករា ឆ្នាំ២០២៤ ក្នុងរបាយការណ៍នោះ កាលពីថ្ងៃទី៨ ខែមករា ឆ្នាំ២០២៤ កន្លងទៅនេះ គណៈបញ្ជាឯកភាពរដ្ឋបាលស្រុកក្រគរ ដែលមានលោក លីវ សេងហ៊ីម អភិបាលស្រុកក្រគរ បានដឹកនាំកិច្ចប្រជុំពិភាក្សា ដោះស្រាយ និងសម្រប សម្រួល លើបញ្ហាការនេសាទដោយឧបករណ៍ឈ្នាងអូសលៀសដោយកំលាំងម៉ាស៊ីន និងការដឹកជញ្ជូនលៀស ដែលមានមាសភាពចូលរួមៈ លោកអភិបាលរង ស្រុកក្រគរ លោកនាយរងផ្នែករដ្ឋបាលជលផលក្រគរ អាជ្ញាធរឃុំកំពង់លួង ។
របាយការណ៍ប្រជុំរវាងអាជ្ញាធរមូលដ្ឋាន និងមន្ត្រីជំនាញលោកអភិបាលស្រុកក្រគរ បានសម្រេចឲ្យមន្ត្រីមូលដ្ឋានកំណត់អត្តសញ្ញាណឲ្យបានច្បាស់លាស់ដើម្បីឲ្យពលរដ្ឋដាក់ពាក្យស្នើសុំរកលៀស និងបានកំណត់ឲ្យត្រឹមចំនួន ៦ការុងក្នុង ១គ្រួសារ(ក្នុង១ការុងស្មើទម្ងន់៨គីឡូក្រាម) ។ ចំពោះទីតាំងអូសលៀស អាជ្ញាធរមូលដ្ឋាន និងមន្ត្រីជំនាញពាក់ព័ន្ធ ត្រូវកំណត់ទីកន្លែងឲ្យបានច្បាស់លាស់ ។ ចំពោះការនេសាទដោយប្រើឧបករណ៍កែច្នៃ(ឈ្នាងអូសលៀស)ដោយប្រើប្រាស់កំលាំងម៉ាស៊ីន មន្ត្រីជំនាញជលផល ត្រូវសុំគោលទៅក្រសួងកសិកម្ម រុក្ខាប្រមាញ់ និងនេសាទដើម្បីសម្រេចការអនុញ្ញាតក្នុងការកំណត់កំលាំងម៉ាស៊ីន។
