មណ្ឌលគិរី៖ ឯកឧត្តម ប៉ាវង្ស សុក្រិត រដ្ឋលេខាធិការក្រសួងអភិវឌ្ឍន៍ជនបទ បានមានប្រសាសន៍ ក្នុងកិច្ចប្រជុំផ្សព្វផ្សាយសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារ បន្តឆ្នាំ២០២៤ របស់ក្រសួងអភិវឌ្ឍន៍ជនបទ និងរបាយការណ៍វឌ្ឍនភាពការងារ ត្រីមាសទី១ របស់មន្ទីរអភិវឌ្ឍន៍ជនបទខេត្តមណ្ឌលគិរី ដោយមានការអញ្ជើញចូលរួមពីសំណាក់លោក ជាក់ ម៉េងហ៊ាង អភិបាលរងខេត្ត រួមទាំងមន្ទីរអង្គភាពពាក់ព័ន្ធ អាជ្ញាធរក្រុង/ស្រុក មេឃុំ/ចៅសង្កាត់ និងមន្ត្រីជំនាញជាច្រើនរូប ដែលប្រព្រឹត្តទៅនៅមន្ទីរអភិវឌ្ឍន៍ជនបទខេត្តមណ្ឌលគិរី នាព្រឹកថ្ងៃទី០២ ខែមេសា ឆ្នាំ២០២៤។
ឯកឧត្តម ប៉ាវង្ស សុក្រិត រដ្ឋលេខាធិការក្រសួងអភិវឌ្ឍន៍ជនបទ បានផ្តល់អនុសាសន៍ ៦ចំណុច ដាក់ជូនថ្នាក់ដឹកនាំ និងមន្ត្រីនៃមន្ទីរអភិវឌ្ឍន៍ជនបទខេត្តទាំងអស់ ដើម្បីបន្តអនុវត្តការងាររួមមាន៖ ទី១. សូមណូមពរដល់មន្ទីរអង្គភាពពាក់ព័ន្ធ ចូលរួមសហការជាមួយមន្ត្រីជំនាញ ចៀសវាងការជាន់សមត្ថកិច្ចគ្នា និងដាក់ប្រយោជន៍ប្រជាជន ជាអតិភាព និងទទួលបាននូវគុណតម្លៃជីវិតប្រកបដោយបរិយាប័ន្ន ទាំងផ្នែកសេដ្ឋកិច្ច សង្គម និងវប្បធម៌ ទី២. ផ្សព្វផ្សាយ និងណែនាំដល់ពលរដ្ឋដែលរស់នៅតាមបណ្តាផ្លូវ កុំឲ្យលុបលូបង្ហូរទឹក និងលើកដីខ្ពស់ជាងផ្លូវ ដោយពុំមានការដាក់លូដក់ទឹក ទី៣. ត្រូវណែនាំដល់ប្រជាពលរដ្ឋ នៅតាមដងផ្លូវ កុំឲ្យរំលោភដីចំណីផ្លូវ ចៀសវាងរងផលប៉ះពាល់នានា ទី៤. ស្នើអង្គភាពពាក់ព័ន្ធ ត្រៀមលក្ខណៈចូលរួមសហការ លើការងារអភិវឌ្ឍន៍ភូមិគម្រូ ទី៥. មន្ទីរ ត្រូវខិតខំបំពេញតួនាទី ជាសេនាធិការឲ្យបានល្អ និងសុចរិតរបស់រដ្ឋបាលខេត្ត មានកិច្ចសហប្រតិបត្តិការល្អជាមួយអាជ្ញាធរគ្រប់លំដាប់ថ្នាក់ មន្ទីរពាក់ព័ន្ធនានា ដើម្បីជំរុញការងារអភិវឌ្ឍន៍ជនបទឲ្យកាន់តែល្អប្រសើរ។ និងទី៦. ត្រូវផ្លាស់ប្តូរឥរិយាបទ ផ្នត់គំនិត របៀបរបប ក្នុងការបំពេញការងារ ជាពិសេស ត្រូវខិតខំអភិវឌ្ឍសមត្ថភាពខ្លួនតាមជំនាញ និងបច្ចេកទេសព័ត៌មានវិទ្យា និងឌីជីថល ដើម្បីធានាអនុវត្តការងារមានប្រសិទ្ធភាព ឆ្លើយតបទៅនឹងផែនការ ការអភិវឌ្ឍន៍សង្គម និងសេដ្ឋកិច្ច។
លោក ជាក់ ម៉េងហ៊ាង អភិបាលរងខេត្ត បានគាំទ្រចំពោះការលើកផែនការរបស់ក្រសួងអភិវឌ្ឍន៍ជនបទ សម្រាប់ឆ្នាំ២០២៤ និងសំណូមពរ នូវការឧបត្ថម្ភគាំទ្រពីថ្នាក់ដឹកនាំក្រសួងជាចាំបាច់ពុំអាចខ្វះបាន ទាំងបច្ចេកទេស និងធនធាន ពិសេស គឺការអភិវឌ្ឍសមត្ថភាពមន្ត្រី ដើម្បីរត់ឱ្យទាន់សម័យបច្ចេកវិទ្យាឌីជីថល ដូចបានចែងក្នុងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ដែលមាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី។ លោក អភិបាលរងខេត្ត បានណែនាំបន្ថែមដល់ថ្នាក់ដឹកនាំ និងមន្ត្រីនៃមន្ទីរអភិវឌ្ឍន៍ជនបទខេត្ត ត្រូវចេះសាមគ្គីភាពផ្ទៃក្នុង និងបន្តខិតខំអភិវឌ្ឍន៍ផ្លូវនៅតាមជនបទ ឲ្យបានល្អប្រសើរ ដើម្បីធ្វើយ៉ាងឲ្យប្រជាពលរដ្ឋមានទំនុកចិត្ត និងឲ្យពួកគាត់រស់នៅមានជីវភាពធូរធារ៕
