ខេត្តឧត្តរមានជ័យ៖ សេចក្តីរាយការណ៍ពីប្រជាពលរដ្ឋបានឲ្យដឹងថាៈ ទីតាំងដែលបុគ្គលឈ្មោះ ឡេង បើកសង្វៀនបញ្ជល់មាន់ និងបាញ់អាប៉ោង គឺនៅចំណុចក្នុងចំការស្វាយចន្ទី ចូលតាមផ្លូវលំ(អង់តែន ០១១) ភូមិត្រពាំងប្រាសាទ ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។ ក្នុងមួយថ្ងៃៗអ្នកលេងល្បែងជាច្រើនរាប់សិបនាក់ មកប្រមូលផ្តុំគ្នាយ៉ាងពពាក់ពពូន លេងចាប់ពីព្រឹកដល់ល្ងាចជារៀងរាល់ថ្ងៃ រាប់ខែ រាប់ឆ្នាំ កន្លងមកហើយ ហើយការបញ្ជល់មាន់មួយគូៗមានភ្នាល់ដាក់លុយចាប់ពី រាប់សិបម៉ឺនរៀល ដល់រាប់លានរៀល ហើយមានអ្នកចាក់លុយខាងក្រៅយ៉ាងប្រសេចប្រសាចថែមទៀត។
អាជ្ញាធរមានសមត្ថកិច្ចនិងមន្ត្រីកងរាជអាវុធហត្ថ ក្នុងស្រុកត្រពាំងប្រាសាទ ត្រូវប្រជាពលរដ្ឋរិះគន់ថា មិនយកចិត្តទុកដាក់បង្ក្រាបល្បែងស៊ីសងខុសច្បាប់ ដែលកំពុងធ្វើឲ្យប៉ះពាល់ដល់សន្តិសុខសង្គមនោះទេ។ ប្រភពព័ត៌មានពីប្រជាពលរដ្ឋក្នុង ស្រុកត្រពាំងប្រាសាទ បានឲ្យដឹងថា នៅក្នុងមូលដ្ឋានរបស់ពួកគាត់មានបុគ្គលម្នាក់ឈ្មោះ ឡេង បើកសង្វៀនបញ្ជល់មាន់ និងបាញ់អាប៉ោង ទ្រង់ទ្រាយធំ ដោយមន្ត្រីអាជ្ញាធរនិងសមត្ថកិច្ចពាក់ព័ន្ធក្នុងមូលដ្ឋាន មិនដែលចាត់វិធានការទប់ស្កាត់ចាប់បង្ក្រាបឡើយ។
ទាំងអធិការដ្ឋាននគរបាលស្រុក ទាំងមូលដ្ឋានកងរាជអាវុធហត្ថស្រុកត្រពាំងប្រាសាទ បានរក្សាភាពស្ងៀមស្ងាត់ទុកឲ្យបុគ្គលឈ្មោះ ឡេង ធ្វើអ្វីៗតាមអំពើចិត្ត។ ហេតុនេះហើយ ទើបប្រជាពលរដ្ឋអំពាវនាវឲ្យលោកឧត្តមសេនីយ៍ទោ ហួត សុធី ស្នងការនគរបាលខេត្ត និងឯកឧត្តម ប៉ែន កុសល្យ អភិបាលនៃគណៈអភិបាលខេត្តឧត្តរមានជ័យ មានចំណាត់ការបង្ក្រាបបនល្បែងស៊ីសងខុសច្បាប់ នៅក្នុងចំណុចទីតាំងខាងលើជាបន្ទាន់ផង ដើម្បីពង្រឹងសន្តិសុខសង្គមឲ្យស្របទៅតាមគោលនយោបាយ ភូមិ ឃុំ មានសុវត្ថិភាពទាំង៩ចំណុច។ (ព័ត៌មានបឋម)
