មណ្ឌលគិរី ÷ ឯកឧត្តម ម៉ែន ង៉ុយ ប្រធានក្រុមប្រឹក្សាខេត្តមណ្ឌលគិរី បានថ្លែងបែបនេះ កាលពីព្រឹកថ្ងៃទី ០២ ខែមីនា ឆ្នាំ ២០២២ ក្នុងកិច្ចប្រជុំក្រុមប្រឹក្សាខេត្តមណ្ឌលគិរី លើកទី ៣៣ អាណត្តិទី៣ ដោយមានការអញ្ជើញចូលរួមពីលោក ប៉េង សម្បត្តិអភិបាលរងខេត្តមណ្ឌលគិរី ឯកឧត្តម លោកជំទាវសមាជិក សមាជិកាក្រុមប្រឹក្សាខេត្ត លោកនាយករងរដ្ឋបាលសាលាខេត្ត លោក លោកស្រី ប្រធាន អនុប្រធានមន្ទីរអង្គភាពជុំវិញខេត្ត មេបញ្ជាការកងកម្លាំងប្រដាប់អាវុធទាំង ៣ ប្រភេទ លោក លោកស្រីអភិបាលអភិបាលរងក្រុង ស្រុកទាំង ៥ ដែលកិច្ចប្រជុំនេះធ្វើឡើងតាមប្រព័ន្ធវីដេអូពីចំងាយ Zoom ។
ឯកឧត្តម ម៉ែន ង៉ុយ ប្រធានក្រុមប្រឹក្សាខេត្តមណ្ឌលគិរី មានប្រសាសន៍ថា នៅមុនកិច្ចប្រជុំក្រុមប្រឹក្សាខេត្ត មន្ទីរអង្គភាពនិងអាជ្ញាធរក្រុងស្រុកទាំង ៥ ក៏មានកិច្ចប្រជុំជាមួយនឹងគណៈអភិបាលខេត្ត ដើម្បីពិនិត្យផ្ទៀងផ្ទាត់របាយការណ៍ សកម្មភាពការងារ ខ្លឹមសារ អក្ខរាវិរុទ្ធ ឲ្យបានត្រឹមត្រូវ ដូច្នេះ ប្រធានមន្ទីរអង្គភាព អភិបាលក្រុងស្រុក ត្រូវពិនិត្យមើលឱ្យបានល្អត់ល្អន់ លើរបាយការណ៍សកម្មភាពការងាររបស់ខ្លួន និងត្រូវសហការឲ្យបានជិតស្និទ្ធជាមួយការិយាល័យសរុប នៃរដ្ឋបាលខេត្ត ដើម្បីកែសម្រួលរបាយការណ៍ឲ្យបានត្រឹមត្រូវមុនដាក់ជូនអង្គប្រជុំ ។
ឯកឧត្តមប្រធានក្រុមប្រឹក្សាខេត្ត ក៏បានជំរុញដល់អភិបាលក្រុងស្រុក ត្រូវណែនាំឲ្យមន្ត្រីក្រោមឱវាទ អាជ្ញាធរឃុំ សង្កាត់ ពង្រឹងការបម្រើសេវាសាធារណ:ជូនប្រជាពលរដ្ឋឲ្យបានល្អប្រសើរ ទាន់ពេលវេលា និងត្រូវបង្កើនកិច្ចសហការជាមួយមន្ទីរអង្គភាពជំនាញផ្សេងៗ ដើម្បីពង្រឹងប្រសិទ្ឋភាពការងារ ។ ម្យ៉ាងវិញទៀត សូមឲ្យមន្ត្រីជំនាញពាក់ព័ន្ធនឹងការប្រមូលចំណូល ខិតខំប្រឹងប្រែងប្រមូលចំណូល តាមវិស័យជំនាញរបស់ខ្លួន ដើម្បីបង្កើនចំណូលថវិកាជាតិ ព្រោះរាជរដ្ឋាភិបាលបានចំណាយថវិកាជាតិយ៉ាងច្រើន ទៅលើការប្រយុទ្ធប្រឆាំងនឹងជំងឺកូវីដ-១៩ ដូចជាការទិញវ៉ាក់សាំងចាក់ជូនប្រជាពលរដ្ឋ ការឧបត្ថម្ភសាច់ប្រាក់ជូនជនក្រីក្រ និងជួយលើវិស័យដែលរងផលប៉ះពាល់ខ្លាំងដោយសារវិបត្តិកូវីដនេះ ។
ក្រៅពីនេះឯកឧត្តម ម៉ែន ង៉ុយ បានស្នើដល់ប្រធានមន្ទីរអប់រំ និងអាជ្ញាធរមូលដ្ឋាន ជួយជំរុញដល់ សិស្សានុសិស្ស មាតាបិតាដែលមានកូនគ្រប់អាយុ ១៨ ឆ្នាំ សូមទៅធ្វើអត្តសញ្ញាណប័ណ្ណឲ្យបានគ្រប់គ្នា នឹងត្រូវចុះឈ្មោះបោះឆ្នោត ដើម្បីបំពេញកាតព្វកិច្ចជាពលរដ្ឋខ្មែរ ។ ឯកឧត្តមក៏បានស្នើដល់ប្រជាពលរដ្ឋទាំងអស់ ត្រូវបន្តអនុវត្តវិធានការរបស់រាជរដ្ឋាភិបាល ៣ កុំ ៣ ការពារ និង ចាក់វ៉ាក់សាំងតាមការជូនដំណឹងរបស់ក្រសួងសុខាភិបាល អាជ្ញាធរខេត្ត ដើម្បីកាត់បន្ថយការឆ្លងជំងឺកូវីដ-១៩ ៕
