មណ្ឌលគិរី ÷ រដ្ឋបាលខេត្តមណ្ឌលគិរី សហការជាមួយក្រសួងសង្គមកិច្ច អតីតយុទ្ធជន និង យុវនីតិសម្បទា បានបើកកិច្ចប្រជុំបូកសរុបលទ្ធផលការងារឆមាសទី១ ឆ្នាំ២០២២ ស្ដីពីការអនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ កុមារក្រោមអាយុ២ឆ្នាំ ជនមានពិការភាព គ្រួសារក្រីក្រ ងាយរងគ្រោះ ក្នុងអំឡុងពេលប្រយុទ្ធប្រឆាំងជំងឺកូវីដ-១៩ និងលើកទិសដៅអនុវត្តបន្ត ក្រោមអធិបតីភាព ឯកឧត្តម ថង សាវុន អភិបាលនៃគណៈអភិបាលខេត្តមណ្ឌលគិរី និង ឯកឧត្តម ឈួរ សុបញ្ញា ប្រតិភូរាជរដ្ឋាភិបាលទទួលបន្ទុកអគ្គនាយក មូលនិធិជាតិជំនួយសង្គម ដោយមានការអញ្ជើញចូលរួមពីលោកជំទាវប្រធាន គ.ក.ស.ក ខេត្ត លោកស្រីអភិបាលរងខេត្ត មន្ទីរ អង្គភាពពាក់ព័ន្ធ មេឃុំ ចៅសង្កាត់ ដែលកិច្ចប្រជុំនេះប្រព្រឹត្តទៅនៅថ្ងៃទី ២២ ខែកក្កដា ឆ្នាំ ២០២២ នៅអគាររដ្ឋបាលសាលាខេត្តមណ្ឌលគិរី ។
ឯកឧត្តម ថង សាវុន អភិបាលខេត្តមណ្ឌលគិរី បានថ្លែងកោតសរសើរដល់មន្ទីរសង្គមកិច្ច និងអាជ្ញាធរពាក់ព័ន្ធ ជាពិសេសអាជ្ញាធរឃុំ សង្កាត់ ដែលបានខិតខំប្រឹងប្រែង អនុវត្តកម្មវិធីឧបត្ថម្ភសាច់ប្រាក់ជូនជនក្រីក្រ ស្ត្រីមានផ្ទៃពោះនិងកុមារតូច ក្នុងកំឡុងពេលវិបត្តិនៃជំងឺកូវីដ-១៩ បានល្អប្រសើរប្រកបដោយតម្លាភាព និងការទទួលខុសត្រូវខ្ពស់ ។ ឯកឧត្តមបានបន្ថែមថា ក្រោមការដឹកនាំប្រកបដោយភាពឈ្លាសវៃរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវផែនការយុទ្ធសាស្ត្រក្នុងការទប់ស្កាត់ គ្រប់គ្រងជំងឺកូវីដ-១៩ យ៉ាងមានប្រសិទ្ធភាព និងបានផ្ដល់នូវវាក់សាំងការពារជំងឺកូវីដ-១៩ ដល់ប្រជាពលរដ្ឋទូទាំងប្រទេស និងជនបរទេសដែលស្នាក់នៅកម្ពុជា ពីដូសទី១ និង ដូសបន្តបន្ទាប់ ដោយឥតគិតថ្លៃ ។ ម្យ៉ាងទៀត រាជរដ្ឋាភិបាលក៏បានយកចិត្តទុកដាក់គិតគូរពីជីវភាពរស់នៅរបស់ប្រជាពលរដ្ឋ ដោយបានដាក់ចេញនូវកម្មវិធីឧបត្ថម្ភសាច់ប្រាក់ ដល់ជនក្រីក្រ ស្ត្រីមានផ្ទៃពោះ ជនមានពិការភាព និងកុមារក្រោមអាយុ២ឆ្នាំ ដែលជាកម្មវិធីគាំពារសង្គម ដើម្បីផ្ដល់នូវអត្ថប្រយោជន៍ពិតប្រាកដ និងតម្រូវការចាំបាច់ជាក់ស្ដែង ជួយសម្រួលទៅដល់ជីវភាពរស់នៅរបស់ប្រជាពលរដ្ឋ ។
ឯកឧត្តមអភិបាលខេត្ត ក៏បានស្នើដល់មន្ទីរ និងអាជ្ញាធរឃុំ សង្កាត់ ត្រូវបន្តយកចិត្តទុកដាក់បន្ថែមទៀតក្នុងការអនុវត្តកម្មវិធីឧបត្ថម្ភសាច់ប្រាក់នេះ ដោយឈរលើគោលការណ៍ច្បាប់និងគោលការណ៍ណែនាំរបស់ក្រសួង ធ្វើយ៉ាងណាឱ្យកម្មវិធីនេះផ្ដល់អត្ថប្រយោជន៍ផ្ទាល់ដល់ប្រជាពលរដ្ឋគោលដៅ ស្របតាមគោលនយោបាយរបស់រាជរដ្ឋាភិបាល ។
ឯកឧត្តម ឈួរ សុបញ្ញា ប្រតិភូរាជរដ្ឋាភិបាលទទួលបន្ទុកអគ្គនាយកមូលនិធិជំនួយសង្គម នៃក្រសួងសង្គមកិច្ច អតីតយុទ្ធជន និង យុវនីតិសម្បទា បានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំខេត្ត ចំពោះកិច្ចសហការល្អជាមួយក្រសួង ក៏ដូចជាផ្ដល់ការគាំទ្រដល់មន្ទីរ អាជ្ញាធរមូលដ្ឋាន ដើម្បីឲ្យការអនុវត្តកម្មវិធីឧបត្ថម្ភសាច់ប្រាក់នេះ ដោយរលូន ។ ឯកឧត្តមក៏បានជំរុញដល់ មូលដ្ឋាន និងមន្ទីរសង្គមកិច្ច ត្រូវតាមដាន ពិនិត្យ និងផ្សព្វផ្សាយ ឲ្យបានទូលំទូលាយធ្វើយ៉ាងណាឱ្យប្រជាពលរដ្ឋអ្នកទទួលផល បានដឹងពីកម្មវិធីគោលនយោបាយរបស់រាជរដ្ឋាភិបាល ស្របតាមគោលនយោបាយជាតិគាំពារសង្គម ឆ្នាំ២០១៦-២០២៥ ។
យោងរបាយការណ៍របស់លោក ខឹម សុផុន ប្រធានមន្ទីរសង្គមកិច្ច អតីតយុទ្ឋជន និងយុវនីតិសម្បទាខេត្ត ក្នុងរយៈពេល ៦ ដើមឆ្នាំ ២០២២ នេះ មន្ទីរបានឧបត្ថម្ភសាច់ប្រាក់ ជូនស្ត្រីមានផ្ទៃពោះនិងកុមារក្រោមអាយុ ២ឆ្នាំ ចំនួន ២៨១ នាក់ ស្មើនឹងទឹកប្រាក់ ៩៥.០៨០.០០០ រៀល ឧបត្ថម្ភសាច់ប្រាក់ជូនជនក្រីក្រ ងាយរងគ្រោះ មានចំនួន ៤៧១០គ្រួសារ ស្មើនឹងចំនួនទឹកប្រាក់ ៥.៧៦១.៧១៦.០០០រៀល ៕
