នារសៀលថ្ងៃព្រហស្បតិ៍ ១៥រោច ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៨ ខែកក្កដា ឆ្នាំ២០២២ ឯកឧត្តម វ៉ា ថន អភិបាលខេត្ត អញ្ជើញទទួលជួបសម្តែងការគួរសមជាមួយឯកឧត្តម ផាម ហ្វាងហៀប អនុរដ្ឋមន្ត្រីក្រសួងការបរទេស នៃសាធារណរដ្ឋសង្គមនិយមវៀតណាម ស្តីពីការរឹតចំណងមិត្តភាពកិច្ចសហប្រតិបត្តិការទ្វេភាគីរវាងខេត្តក្រចេះ នៃព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ។
ក្នុងឱកាសនោះ ឯកឧត្តម វ៉ា ថន អភិបាលខេត្តក្រចេះ បានមានប្រសាសន៍ស្វាគមន៍ចំពោះវត្តមាន ឯកឧត្តម ផាម ហ្វាងហៀប អនុរដ្ឋមន្ត្រីក្រសួងការបរទេស នៃសាធារណរដ្ឋសង្គមនិយមវៀតណាម ដែលបានដឹកនាំក្រុមការងារអញ្ជើញមកជួបពិភាក្សាការងារ និងបានសង្ខេបអំពីលក្ខណៈភូមិសាស្ត្រប្រជាសាស្ត្រការអភិវឌ្ឍន៍ និងកិច្ចសហប្រតិបត្តិការទ្វេភាគី ខេត្តក្រចេះ និងសាធារណរដ្ឋសង្គមនិយមវៀតណាម ដោយក្នុងនោះខេត្តក្រចេះមានច្រកទ្វារព្រំដែនចំនួន០៣ គឺច្រកទ្វារព្រំដែនទ្វេភាគី(ជ័យឃ្លាំង-ទិនទៀង)ច្រកទ្វារព្រំដែនទ្វេភាគី (អូរលាវ-ជ្រាវ) និងច្រកទ្វារព្រំដែនអន្តរជាតិ(ត្រពាំងស្រែ-វ៉ាលឺ)។ ខេត្តក្រចេះមានក្រុមហ៊ុនវៀតណាមមកវិនិយោគដីសម្បទានសេដ្ឋកិច្ចលើដំណាំកសិ-ឧស្សាហកម្មចំនួន ១៦ក្រុមហ៊ុន ក្នុងនោះបុគ្គលិកវៀតណាម ចំនួន ៥៣៣នាក់ បុគ្គលិកជាជនជាតិខ្មែរចំនួន ៤៤០នាក់ និងកម្មករខ្មែរ ៣៧១៩នាក់ ។ ទន្ទឹមនេះ ក្នុងវិស័យរ៉ែមានក្រុមហ៊ុនវៀតណាមវិនិយោគលើវិស័យថ្មអាក្រានីតចំនួន ០១ក្រុមហ៊ុនផងដែរ ។
ឯកឧត្តមអភិបាលខេត្តបន្តថា ៖ ដោយផ្អែកលើចំណងមិត្តភាព សាមគ្គីភាព កិច្ចសហប្រតិបត្តិការ រវាងប្រទេសទាំងពីរ នៃព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាមកាន់តែត្រូវបានពង្រឹង និងមានភាពល្អប្រសើរ ខេត្តក្រចេះ ខេត្តប៊ិញយឿង និងខេត្តប៊ិញភឿក សម្រេចបានលទ្ធផលគួរឲ្យកត់សម្គាល់ ក្នុងនោះបានបង្កលក្ខណៈងាយស្រួលដល់ប្រជាពលរដ្ឋនៅតាមតំបន់ព្រំដែន អាជីវករ ពាណិជ្ជករ បណ្ដាវិនិយោគិនឆ្លងកាត់ ក្នុងការទិញ លក់ដូរទំនិញ និងការសម្របសម្រួលសួរសុខទុក្ខញាតិមិត្ត និងចេញចូលព្យាបាលជំងឺ និងការងាររុករកគាស់លើកអដ្ឋិធាតុកងទ័ពស្ម័គ្រចិត្តវៀតណាមដែលបានពលីជីវិតកាលសម័យសង្គ្រាមក្នុងភូមិសាស្ត្រខេត្តក្រចេះ ។
មានប្រសាសន៍កោតសរសើ និងវាយតម្លៃខ្ពស់ចំពោះខេត្តក្រចេះ ពីឯកឧត្តម ផាម ហ្វាងហៀប អនុរដ្ឋមន្ត្រីក្រសួងការបរទេស នៃសាធារណរដ្ឋសង្គមនិយមវៀតណាម ខេត្តក្រចេះ គឺជាទឹកដីដ៏ស្រស់ស្អាត និងជាទឹកដីអំណោយផលលើផ្នែកកសិកម្ម ឃើញថាប្រជាពលរដ្ឋបានបង្ករបង្កើនផលបានច្រើនពេញផ្ទៃដី និងបានផលល្អមានការនាំចេញទៅក្រៅ ហើយខេត្តក្រចេះបានសម្រេចបញ្ចប់ការឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ កន្លងមក ប្រកបដោយសុវត្ថិភាព តម្លាភាព ជោគជ័យ ហើយអ្វីគួរឲ្យគត់សម្គាល់នោះ គឺខេត្តក្រចេះបានគ្រប់គ្រងស្ថានភាពជំងឺកូវីដ ដោយប្រើប្រាស់យុទ្ធសាស្ត្រស្រោចវ៉ាក់សាំងជំងឺកូវីដបានជោគជ័យ និងមានប្រសិទ្ធភាពដោយការចូលរួមរបស់ប្រជាពលរដ្ឋ ។ ហើយខេត្តនិងប្រទេសទាំង២ គឺជាចំណងមិត្តភាព និងជាបង្គោលគ្រឹះដ៏រឹងមាំក្នុងការកសាងនិងអភិវឌ្ឍន៍វិស័យសេដ្ឋកិច្ច រវាងព្រំដែនខេត្តទាំង២ឲ្យបន្តឆ្ពោះទៅរកភាពជោគជ័យ ទាំងបច្ចុប្បន្ននិងថ្ងៃអនាគត ។
ប្រតិភូទាំង២បានធ្វើឯកភាពព្រមព្រៀងគ្នាទៅលើការស្នើសុំររវាងភាគ្គីទាំង២ ដើម្បីបន្តជម្រុញសាមគ្គីភាពលើកិច្ចសហប្រតិបត្តការណ៍ច្រកព្រំដែនទាំង២ ដើម្បីបង្ករលក្ខណ:ងាយស្រួលដល់ក្រុមហ៊ុនវិនិយោគ និងប្រជាពលរដ្ឋដែលជាកម្មករ ពលករប្រទេសទាំង២ ទទួលបានការធ្វើ សំដៅលើកស្ទួយជីវភាពប្រជាពលរដ្ឋនៅតាមបន្ទាត់ព្រំដែរ ៕
