ក្រចេះ..ព្រឹកថ្ថ្ងៃទី ០៤ ខែមីនា ឆ្នាំ២០២៤ ឯកឧត្តម ភឹម ភីរ៉ា អភិបាលរងខេត្ត និងជាប្រធានគណៈកម្មាធិការបណ្តុះបណ្តាលខេត្ត អញ្ជើញដឹកនាំកិច្ចប្រជុំគណៈកម្មាធិការបណ្ដុះបណ្តាលខេត្តក្រចេះ ស្តីពីវឌ្ឍនភាពការងារសម្រេចបានត្រីមាសទី១ និងលើកទិសដៅអនុវត្តបន្ត ត្រីមាសទី២ របស់វិទ្យាស្ថានពហុបច្ចេកទេសភូមិភាគតេជោសែនឦសាន ដោយមានការចូលរួមពី មន្ទីរ-អង្គភាពជុំវិញខេត្ត និងភាគីពាក់ព័ន្ធ អង្គការដៃគូរផងដែរ ។
លោក អ៊ង់ គឹមភឿន នាយកវិទ្យាស្ថានពហុបច្ចេកទេសភូមិភាគតេជោសែនឦសាន បានឱ្យដឹងថាវិទ្យាស្ថានបានរៀបចំកសាងផែនការយុទ្ធសាស្ត្រ ២០២៤-២០២៨ របស់គណៈកម្មាធិការបណ្តុះបណ្តាលខេត្ត សម្រាប់ខេត្តក្រចេះ និងភូមិភាគឦសាន បានធ្វើការផ្សព្វផ្សាយជ្រើសរើសសិស្សក្នុងកម្មវិធីបណ្តុះបណ្តាលបច្ចេកទេសនិងវិជ្ជាជីវៈ ក្នុងដំណាក់កាលទី២ សម្រាប់គ្រួសារក្រីក្រ និងគ្រួសារងាយរងហានិភ័យ គ្រួសារដែលមាន បណ្ណសំគាល់ពិការភាព គ្រួសារដែលមានបណ្ណមូលនិធិសមធម៌សុខាភិបាល និងយុវជនដែលឧទ្ទេសនាមដោយ រដ្ឋបាលខេត្ត ក្រុង ស្រុក អោយមកទទួលការបណ្តុះបណ្តាលជំនាញ បច្ចេកទេស និងវិជ្ជាជីវៈ ហើយស្ថិតក្រោមការបណ្តុះបណ្តាល ក្នុងត្រីមាសទី១ឆ្នាំ២០២៤ របស់សមាជិកPTB (មន្ទីរពាក់ព័ន្ធ) បានបណ្តុះបណ្តាលបានចំនួន៣៨៨នាក់ ។
ឯកឧត្តម ភឹម ភីរ៉ា បានកោតសរសើរ និងវាយតម្លៃចំពោះវិទ្យាស្ថាន ដែលបានរួមសហការជាមួយមន្ទីរ អង្គភាព និងស្ថាប័នដៃគូគាំទ្រ ជាពិសេសសហការជាមួយមន្ទីរព័ត៌មាន ក្នុងការផ្សាព្វផ្សាយ ដល់មូលដ្ឋានរបស់បងប្អូនប្រជាពលរដ្ឋផ្ទាល់ សំដៅធ្វើឱ្យវិស័យការងារ និងបណ្តុះបណ្តាលវិជ្ជាជីវៈ នៅក្នុងខេត្តក្រចេះ មានភាពរីកចម្រើន សេដ្ឋកិច្ចប្រជាជនមានភាពធូរធារ មានការងារធ្វើមានជំនាញពិតប្រាកដ កាត់បន្ថយការចំណាក់ស្រុករកការងារធ្វើស្របទៅនឹងផែនការ និងគោលនយោបាយ ការអភិវឌ្ឍរបស់រាជរដ្ឋាភិបាលថ្មី ។
ឯកឧត្តម ភឹម ភីរ៉ា បានបន្ថែមថា រាជរដ្ឋាភិបាលដែលដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានអនុវត្តកម្មវិធីនយោបាយ ជាអាទិភាពចំនួន៦ចំណុច ដោយក្នុងនោះមានរួមបញ្ចូលការបណ្តុះបណ្តាល ជំនាញវិជ្ជាជីវៈ និងបច្ចេកទេសជូនដល់យុវជនមកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេស ដែលផ្ដោតជាចម្បង លើការផ្តល់ការបណ្ដុះបណ្តាលជំនាញបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យចំនួន១,៥លាននាក់ ក្នុងអាណត្តិទី៧ សម្រាប់ខេត្តក្រចេះ ៦៣០នាក់ ក្នុងឆ្នាំ២០២៤ ៕
