កំពង់ស្ពឺ÷ នៅព្រឹកថ្ងៃទី១៦ ខែឧសភា ឆ្នាំ២០២៥ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានអញ្ជើញជាអធិបតី ក្នុងពិធីសម្ពោធបើកការដ្ឋានសាងសង់ផ្លូវចូលទៅ កាន់ភ្នំខ្នងផ្សារ និងហេដ្ឋារចនាសម្ព័ន្ធ បម្រើឱ្យគោលដៅ លម្ហែបៃតង តំបន់ភ្នំខ្នងផ្សារ នៅភូមិតាំងបំពង់ ស្រុកឱរ៉ាល់ ខេត្តកំពង់ស្ពឺ។
ក្នុងគោលបំណងជំរុញការអភិវឌ្ឍសេដ្ឋកិច្ចនិងលើកកម្ពស់ជីវភាពប្រជាពលរដ្ឋក្នុងតំបន់ តាមរយៈគម្រោងលម្ហែបៃតង ដែលបានការគាំទ្រ និងកិច្ចសហប្រតិបត្តិការផ្នែកហិរញ្ញប្បទានឥណទានពី ធនាគារពិភពលោក ក្រោមក្របខ័ណ្ឌ គម្រោងនិរន្តរភាពតំបន់ទេសភាព និងទេសចរណ៍ធម្មជាតិ (CSLEP) ។
ឯកឧត្តមបណ្ឌិត អ៊ាង សុផល្លែត បានសង្កត់ធ្ងន់ថា គម្រោងនេះ មានន័យលើសពីការសាងសង់ផ្លូវ និងសំណង់ស្ថាបត្យ កម្ម ពីព្រោះស្ថាបត្យកម្មនេះ កើតចេញពីការប្តេជ្ញាចិត្តដ៏ខ្ពស់ និងពេញដោយក្តីស្រឡាញ់ និងការគិតគូរពីសុខទុក្ខរបស់ប្រជាសហគមន៍ តំបន់ការពារធម្មជាតិទេទឹកពុះ និងភ្នំខ្នងផ្សារពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋ មន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត។
ជាមួយគ្នានេះ ប្រជាសហគមន៍តំបន់ការពារក៏បានចូលរួមសហការយ៉ាងជិតស្និទ្ធរវាងរដ្ឋាភិបាល សហគមន៍ ជាដៃគូអភិវឌ្ឍន៍ និងប្រជាពលរដ្ឋក្នុងមូលដ្ឋាន ដែលបានជំរុញ និងបញ្ចេញសក្តានុពលដ៏សម្ងាត់ របស់តំបន់សហគមន៍ទេទឹកពុះ និងភ្នំខ្នងផ្សារ។
ក្នុងនោះក្រសួងបរិស្ថាន ក្រសួងអភិវឌ្ឍន៍ជនបទ កំពុងអនុវត្តគម្រោងនេះ ដើម្បីជួយដល់ការអភិវឌ្ឍហេដ្ឋារចនាសម្ព័ន្ធ និងសម្បទាបម្រើឱ្យគោលដៅលំហែបៃតងភ្នំខ្នងផ្សារ នៅក្នុងភូមិ សាស្ត្រខេត្តកំពង់ស្ពឺ និងខេត្តកោះកុង។
ឯកឧត្តមរដ្ឋមន្ត្រីបានបន្ថែមថាហេដ្ឋារចនាសម្ព័ន្ធទាំងនេះ នឹងត្រូវផ្តល់ជូនសហគមន៍មូលដ្ឋានធ្វើការគ្រប់គ្រង ដើម្បីលើក កម្ពស់ជីវភាពគ្រួសារប្រជាពលរដ្ឋ និងប្រែក្លាយសហគមន៍ឱ្យទៅជាសហគ្រិនប្រកបដោយភាពជាម្ចាស់ ដែលជាការប្តូរពីការពឹងផ្អែកលើការកាប់ឈើ និងបរបាញ់សត្វព្រៃខុសច្បាប់ មកចូលរួមចំណែក ក្នុងការការពារ និងអភិរក្សធនធានធម្មជាតិ។
នេះបើតាមការបញ្ជាក់និងលើកឡើងរបស់ឯកឧត្តមរដ្ឋមន្ត្រីក្រសួងបរិស្ថាន នាព្រឹកថ្ងៃ១៦ ខែឧសភា ដដែល នៅក្នុងពិធីបានឲ្យដឹងថាថា ហេដ្ឋារចនាសម្ព័ន្ធថ្មីៗ នាពេលនេះរួមមាន៖ ផ្លូវ ខ្លោងទ្វារ ចំណតយានយន្ត ប្រព័ន្ធបំភ្លឺដោយថាមពលព្រះ អាទិត្យ ទឹកស្អាត កន្លែងបោះតង់ ផ្លូវថ្មើរជើងក្នុងព្រៃ ស្លាកសញ្ញា កន្លែងសង្គ្រោះបឋម អាហារដ្ឋាន និងកន្លែងទុកដាក់សំរាម។
ជារួមការសាងសង់ទាំងនេះត្រូវអនុលោមតាមរចនាបទខ្មែរ និងរក្សាបាននូវសោភ័ណភាព សម្រស់ធម្មជាតិ ដោយភាពស្អាត ភាពបៃតង និងចីរភាព ជាសុខដុមរមណីយកម្មនៃមេត្រីភាពបរិស្ថាន៕
