កណ្ដាល.ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល មានកិត្តិយសសូមឆ្លើយតបបំភ្លឺជូនសាធារណជនទៅនឹងគេហទំព័រ ព័ត៌មាន ព្រាប មេស៊ីនជើ ធីវី PREAB MESSENGER TV ដែលបានផ្សព្វផ្សាយមានខ្លឹមសារ៖ ទីតាំងបង្កប់ល្បែងស៊ីសងប្រភេទមាន់ ភូមិត្រេីយបឹង ឃុំព្រៃពួច ស្រុកអង្គស្នួល ខេត្តកណ្តាល កំពុងបេីកលេងយ៉ាងអនាធិបតេយ្យគ្មានខ្លាចញញេីត និងអាជ្ញាធរ ព្រមទាំងមន្ត្រីពាក់ព័ន្ធក្នុងមូលដ្ឋានបន្តិចសោះឡើយ។ សូមគោរពស្នេីសុំដល់មន្ត្រីពាក់ព័ន្ធក្នុងមូលដ្ឋានមេត្តាចុះត្រួតពិនិត្យទីតាំងល្បែងស៊ីសងប្រភេទមាន់ ខាងលើនេះផងទាន !
ដោយអនុវត្តតាមការដឹកនាំបញ្ជាដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ និងឯកឧត្តម គួច ចំរើន អភិបាល នៃគណៈអភិបាលខេត្តកណ្តាល លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាឱ្យលោកអធិការនគរបាលស្រុកអង្គស្នួល ស្រាវជ្រាវករណីខាងលើជាបន្ទាន់៖
ជាលទ្ធផល៖
នៅរសៀលថ្ងៃទី០៩ ខែតុលា ឆ្នាំ២០២៥ លោកអធិការនគរបាលស្រុកអង្គស្នួល បានបញ្ជាកម្លាំងផ្នែកនគរបាលយុត្តិធម៌ស្រុក សហការជាមួយកម្លាំងប៉ុស្តិ៍នគរនបាលរដ្ឋបាលព្រៃពួច ចុះស្រាវជ្រាវដល់ទីតាំងដែលបានចុះផ្សាយមានម្ចាស់ឈ្មោះ ជា សាវឺន ភេទស្រី អាយុ៦៤ឆ្នាំ ជនជាតិខែ្មរ មុខរបរលក់ដូរ នៅភូមិត្រើយបឹង ឃុំព្រៃពួច ស្រុកអង្គស្នួល ខេត្តកណ្ដាល។
-ផ្អែកតាមលទ្ធផលពិនិត្យជាក់ស្តែងឃើញថា នៅទីតាំងខាងលើជាហាងលក់កាហ្វេ ពុំមានលេងល្បែងស៊ីសងខុសច្បាប់នោះទេ។
-ទីតាំងខាងលើនេះ កម្លាំងប៉ុស្តិ៍នគរបាលរដ្ឋបាលព្រៃពួច សហការជាមួយលោកមេភូមិ ធ្លាប់បានចុះធ្វើកិច្ចសន្យាបញ្ឈប់ការបើកលេងល្បែងស៊ីសង ម្តងរួចមកហេីយ កាលពីថ្ងៃទី០២ ខែតុលា ឆ្នាំ២០២៥។
-ចំណាត់ការបន្តៈ កម្លាំងជំនាញពាក់ព័ន្ធបន្តល្បាតឃ្លាំមើលជាប្រចាំ ប្រសិនមានការលួចលាក់បង្កប់ល្បែងស៊ីសងខុសច្បាស់ នឹងបង្ក្រាបចាត់ការតាមនីតិវិធី។
អាស្រ័យហេតុនេះសូមសាធារណជន និងបណ្តាញសារព័ត៌មានមេត្តាជ្រាបតាមការគួរ!៕
