រតនគិរី៖ ប្រធានមន្ទីរសាធារណការ និងដឹកជញ្ជូនខេត្តរតនគិរីបានប្ដេជ្ញាចិត្ត និងថែទាំគ្រឿងចក្រដែលក្រសួងសាធារណការ ប្រគល់ជូនចំនួន ៨គ្រឿងឲ្យបានល្អ និងប្រើប្រាស់ចំគោលដៅសម្រាប់បម្រើតាមតម្រូវការបងប្អូនប្រជាពលរដ្ឋនៅក្នុងខេត្ត។
ការប្ដេជ្ញាចិត្តបែបនេះរបស់លោក សាយ សាមៀន ប្រធានមន្ទីរសាធារណការ និងដឹកជញ្ជូនខេត្តរតនគិរី និងមន្ត្រីនៃមន្ទីរសាធារណការ បាន ធ្វើឡើងក្នុងឱកាសដែលលោកប្រធានបានអនុញ្ញាតផ្ដល់បទសម្ភាសដល់CNCនៅព្រឹកថ្ងៃទី ២៥ខែមករា ឆ្នាំ២០២១ នៅមន្ទីរសាធារណការ និងដឹកជញ្ជូនខេត្ត។
លោកបានបន្តថាក្នុងនាមលោកជាប្រធានមន្ទីរសាធារណការ និងដឹកជញ្ជូនខេត្តបន្ទាប់ពីគ្រឿងចក្របានមកដល់មន្ទីរ លោក និងក្រុមការងារនៃមន្ទីរសាធារណការ និងដឹកជញ្ជូនខេត្ត សូមថ្លែងអំណរគុណចំពោះប្រមុខរាជរដ្ឋរដ្ឋាភិបាល និងក្រសួងសាធារណការដែលបានយកចិត្តទុកដាក់ផ្ដល់គ្រឿងចក្រដល់តាមខេត្តសម្រាប់ប្រើប្រាស់បម្រើតាមតម្រូវការរបស់ប្រជាពលរដ្ឋ។ ហើយលោកក៏បានប្ដេជ្ញាចិត្ត និងថែទាំគ្រឿងចក្រទាំងអស់ឲ្យបានល្អ និងប្រើប្រាស់ចំគោលដៅ។
សូមជម្រាបថា លោកទេសរដ្ឋមន្ត្រី ស៊ុន ចាន់ថុល និងជារដ្ឋមន្ត្រីនៃក្រសួងសាធារណការ និងដឹកជញ្ជូន បានចែកជូននូវគ្រឿងចក្រ ២៥រាជធានី/ខេត្ត ហើយក្នុងមួយខេត្តបានទទួលគ្រឿងចក្រ ពី ក្រសួងសាធារណការ និងដឹកជញ្ជូនចំនួន ៨គ្រឿង៕
