នាព្រឹកថ្ងៃសៅរ៍ ២រោច ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៩ ខែមីនា ឆ្នាំ២០២២ ឯកឧត្តម គង់ សោភ័ណ្ឌ ប្រធានក្រុមការងារយុវជនគណបក្សប្រជាជនកម្ពុជាខេត្តកណ្តាល បានចូលរួមក្នុងពិធីសំណេះសំណាលជាមួយ យុវជន យុវនារី និងប្រជាពលរដ្ឋក្នុងស្រុកល្វាឯម ដែលត្រូវប្រកាសបញ្ចូលជាសមាជិកគណបក្សប្រជាជនកម្ពុជា និងប្រកាសកែសម្រួលភារកិច្ច និងតែងតាំងមន្ត្រីក្រុមការងារចលនាយុវជនគណបក្សចុះមូលដ្ឋានស្រុកល្វាឯម ក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី សមាជិកគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកណ្តាល ស្ថិតនៅទីស្នាក់ការគណបក្សប្រជាជនកម្ពុជាស្រុកល្វាឯម ខេត្តកណ្តាល។
ក្នុងពិធីបញ្ចូលសមាជិកថ្មីនៃគណបក្សប្រជាជនកម្ពុជាស្រុកល្វាឯមនេះដែរ ក៏មានការអញ្ជើញចូលរួម ពីឯកឧត្តម លោកជំទាវ អនុប្រធាន ក្រុមការងាររាជរដ្ឋាភិបាលចុះមូលដ្ឋានខេត្តកណ្តាល ឯកឧត្តម លោកជំទាវ ប្រធានក្រុមការងាររាជរដ្ឋាភិបាលចុះមូលដ្ឋានក្រុង ស្រុក លោក លោកស្រី ក្រុមការងារចលនាយុវជនរបស់ថ្នាក់កណ្តាលចុះជួយឃុំ គណៈអចិន្ត្រៃយ៍គណបក្សស្រុកល្វាឯម ប្រធានគណៈកម្មាធិការគណបក្សឃុំ និងសមាជិកបញ្ចូលថ្មី សរុបចំនួន៨៥៣នាក់៕
