មណ្ឌលគិរី៖ ឯកឧត្តម ងី ច័ន្ទ្រផល រដ្ឋលេខាធិការក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានមានប្រសាសន៍ ក្នុងពិធីបិទសន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ របស់រដ្ឋបាលខេត្តមណ្ឌលគិរី ដោយមានការចូលរួមពីសំណាក់ឯកឧត្តម ថង សាវុន អភិបាលខេត្តមណ្ឌលគិរី ឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត រួមទាំង ឯកឧត្តម លោកជំទាវ ក្រុមការងាររាជរដ្ឋាភិបាលចុះមូលដ្ឋានខេត្ត សមាជិកក្រុមប្រឹក្សាខេត្ត អភិបាលរងខេត្ត កងកម្លាំងប្រដាប់អាវុធទាំងបី និងមន្ត្រីរាជការជាច្រើនរូប ដែលប្រព្រឹត្តទៅនៅអគារក្រុមប្រឹក្សាខេត្តមណ្ឌលគិរី នាព្រឹកថ្ងៃទី២៤ ខែមីនា ឆ្នាំ២០២២។
ឯកឧត្តម ងី ច័ន្ទ្រផល រដ្ឋលេខាធិការក្រសួងមហាផ្ទៃ បានថ្លែងនូវការកោតសរសើរ និងការវាយតម្លៃខ្ពស់ចំពោះថ្នាក់ដឹកនាំ មន្ត្រីរាជការ កងកម្លាំងសមត្ថកិច្ច និងក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី ដែលបានខិតខំប្រឹងប្រែងរួមគ្នាយ៉ាងសកម្ម ក្នុងការបំបេញតួនាទី ភារកិច្ចប្រកបដោយស្មារតីទទួលខុសត្រូវខ្ពស់ ដើម្បីសម្រេចនៅសមិទ្ធផល ក្នុងការធានាថែរក្សាសុខសន្តិភាព ស្ថិរភាពនយោបាយ ការរក្សាសន្តិសុខ សណ្តាប់ធ្នាប់សាធារណៈ ការលើកម្ពស់លទ្ធិប្រជាធិបតេយ្យ និងជំរុញការអភិវឌ្ឍសេដ្ឋកិច្ច-សង្គម ស្របតាមគោលនយោបាយរបស់រាជរដ្ឋាភិបាល សំដៅលើកម្ពស់ជីវភាពរស់នៅ និងកាត់បន្ថយភាពក្រីក្រជូនពលរដ្ឋ។ ឯកឧត្តម ក៏បានផ្តល់នូវគោលការណែនាំជាគន្លឹះសំខាន់ៗដល់មន្ត្រីថ្នាក់ក្រោមជាតិ ត្រូវអនុវត្តបន្ត៖ ត្រូវចូលរួមថែរក្សាការពារសុខសន្តិភាព ស្ថិរភាពនយោបាយ ឯករាជ្យ បូរណភាណទឹកដី អធិបតេយ្យភាពជាតិ, ត្រូវបង្កើនកិច្ចសហការគ្នា ក្នុងការអនុវត្តគោលនយោបាយភូមិឃុំមានសុវត្ថិភាព, ត្រូវពន្លឿនការដោះស្រាយបញ្ហាវិវាទដីធ្លីឲ្យឆាប់រហ័ស, ត្រូវបង្កើនការតាមដាន និងការគ្រប់គ្រងសកម្មភាពចូលទន្ទ្រានកាន់កាប់ដីធ្លីរបស់ប្រជាពលរដ្ឋ នៅតាមតំបន់ការពារធម្មជាតិ, ត្រូវចុះផ្សព្វផ្សាយដល់ពលរដ្ឋ ឲ្យយល់ច្បាស់អំពីច្បាប់ស្តីពីព្រៃឈើ ច្បាប់ស្តីពីជលផល និងច្បាប់ស្តីពីតំបន់ការពារធម្មជាតិ, ត្រូវបន្តអប់រំ និងផ្សព្វផ្សាយដល់ពលរដ្ឋ ឲ្យរក្សានូវអនាម័យជាប់ជាប្រចាំ ដោយអនុវត្តនូវវិធានការ ៣កុំ និង៣ការពារ និងជំរុញការចាក់វ៉ាក់សាំងកូវីដ-១៩ និងដូសជំរុញជូន
បន្ថែមលើសនេះ ឯកឧត្តម ងី ច័ន្ទ្រផល ក៏បានណែនាំដល់មន្ត្រីរាជការ និងសមត្ថកិច្ច និងអាជ្ញាធរក្រុង/ស្រុក ត្រូវពង្រឹងរបៀបរបបធ្វើការងារ ទំនាក់ទំនងការងារ សាមគ្គីភាព ឯកភាពផ្ទៃក្នុងឲ្យបានល្អ ដើម្បីធ្វើយ៉ាងណា ឲ្យខេត្តមណ្ឌលគិរី មានការអភិវឌ្ឍន៍រីកចម្រើនជាលំដាប់។
នាឳកាសនោះដែរ ឯកឧត្តម ងី ច័ន្ទ្រផល រដ្ឋលេខាធិការក្រសួងមហាផ្ទៃ ក៏បានបំពាក់គ្រឿងឥស្សរិយយស និងមេដាយការងារជូនមន្ត្រីរាជការ ដែលមានស្នាដៃល្អ ក្នុងការអនុវត្តការងារនាពេលកន្លងមក៕
