មណ្ឌលគិរី ÷ នៅព្រឹកថ្ងៃទី ១៩ ខែកក្កដា ឆ្នាំ២០២២ មន្ទីរសេដ្ឋកិច្ចនិងហិរញ្ញវត្ថុខេត្តមណ្ឌលគិរី បានបើកកិច្ចប្រជុំផ្សព្វផ្សាយស្តីពីនីតិវិធីបច្ចេកទេសនៃការរៀបចំគម្រោងថវិការបស់រដ្ឋបាលថ្នាក់ក្រោមជាតិសម្រាប់ការគ្រប់គ្រងឆ្នាំ ២០២៣ ដឹកនាំកិច្ចប្រជុំដោយលោក ប៉េង សម្បត្តិ អភិបាលរងនៃគណៈអភិបាលខេត្តមណ្ឌលគិរី ដោយមានការអញ្ជើញចូលរួមពីលោក រឿង ផៃរិទ្ធិ ប្រធានមន្ទីរសេដ្ឋកិច្ចនិងហិរញ្ញវត្ថុខេត្ត ប្រតិភូអគ្គនាយកដ្ឋានហិរញ្ញវត្ថុរដ្ឋបាលថ្នាក់ក្រោមជាតិនៃក្រសួងសេដ្ឋកិច្ចនិងហិរញ្ញវត្ថុ លោក លោកស្រី អភិបាល អភិបាលរងក្រុង/ស្រុកទាំង៥ មេឃុំចៅសង្កាត់ ទូទាំងខេត្តមណ្ឌលគិរី ដែលកិច្ច ប្រជុំនេះប្រព្រឹត្តទៅនៅមន្ទីរសេដ្ឋកិច្ចនិងហិរញ្ញវត្ថុ ខេត្តមណ្ឌលគិរី ។
លោក ប៉េង សម្បត្តិ អភិបាលរងខេត្ត បានមានប្រសាសន៍ថា កិច្ចប្រជុំផ្សព្វផ្សាយសារាចរណែនាំលេខ ០០៦ សហវ ស្ដីពីនីតិវិធីបច្ចេកទេសនៃការរៀបចំគម្រោងថវិការបស់រដ្ឋបាលថ្នាក់ក្រោមជាតិសម្រាប់ការគ្រប់គ្រងឆ្នាំ ២០២៣ នេះ ពិតជាមានសារៈសំខាន់សម្រាប់កំណត់ក្របខណ្ឌនិងវិធានការព្រមទាំងគោលការណ៍បច្ចេកទេសក្នុងការគ្រោងចំណូលនិងចំណាយសម្រាប់ជាមូលដ្ឋានរបស់រដ្ឋបាលរាជធានី/ខេត្ត ក្រុង/ស្រុក ឃុំ/សង្កាត់ ដើម្បីរៀបចំផែនការសកម្មភាពប្រចាំឆ្នាំរបស់រដ្ឋបាលសាមី សំដៅធ្វើយ៉ាងណាឱ្យការប្រើប្រាស់ថវិកាឆ្លើយតបដោយប្រសិទ្ធភាពនៃការសម្រេចគោលនយោបាយនិងវិស័យអតិភាពរបស់រដ្ឋបាលថ្នាក់ក្រោមជាតិនីមួយៗ ។
លោកអភិបាលរងខេត្តបានបន្ថែមថា ដើម្បីឲ្យគោលដៅទាំងឡាយដែលបានដាក់ចេញនៅក្នុងសារាចរនេះ អនុវត្តសម្រេចជោគជ័យបាន រដ្ឋបាលថ្នាក់ក្រោមជាតិនីមួយៗត្រូវខិតខំរៀបចំគម្រោងថវិកានិងត្រូវគោរពឱ្យបានខ្ជាប់ខ្ជួននូវក្របខណ្ឌនិងបណ្ដាលវិធានការ ព្រមទាំងគោលការណ៍បច្ចេកទេសទាំងឡាយផ្នែកចំណូលនិងចំណាយដែលបានកំណត់ក្នុងសារាចរនេះ ។ ម្យ៉ាងទៀតសូមឲ្យអ្នកចូលរួមក្នុងកិច្ចប្រជុំនេះ យកចិត្តទុកដាក់ស្ដាប់ កត់ត្រា បទបង្ហាញរបស់ប្រតិភូមកពីអគ្គនាយកដ្ឋានហិរញ្ញវត្ថុថ្នាក់ក្រោមជាតិ ព្រមទាំងលើកជាសំណួររាល់ចម្ងល់នានា ដើម្បីឲ្យការរៀបចំថវិកាក្នុងឆ្នាំ ២០២៣ ខាងមុខនេះធ្វើឡើងប្រកបដោយប្រសិទ្ធភាពខ្ពស់ ។
លោក រឿង ផៃរិទ្ធិ ប្រធានមន្ទីរសេដ្ឋកិច្ចនិងហិរញ្ញវត្ថុខេត្ត បានមានប្រសាសន៍ថា រាជរដ្ឋាភិបាលបានដាក់ចេញនូវយុទ្ធសាស្ត្រនៃការកែទម្រង់ប្រព័ន្ធថវិការដ្ឋបាលថ្នាក់ក្រោមជាតិ ដែលជាការកែទម្រង់រយៈពេលវែងនិងគ្រប់ជ្រុងជ្រោយ ក្នុងគោលដៅពង្រឹង និងពង្រីកការអនុវត្តថវិកាកម្មវិធី ដើម្បីធានាបានការផ្សារភ្ជាប់ថវិកាទៅនឹងគោលនយោបាយរដ្ឋបាលថ្នាក់ក្រោមជាតិ និងគោលនយោបាយជាតិ ព្រមទាំងការធ្វើសមាហរណកម្ម ដើម្បីឱ្យផែនការយុទ្ធសាស្ត្ររដ្ឋបាលថ្នាក់ក្រោមជាតិដំណើរការទៅកាន់តែមានប្រសិទ្ធភាព ប្រសិទ្ធិផល ។ លោកប្រធានមន្ទីរ ក៏បានបញ្ជាក់បន្ថែមថា សារាចរណែនាំស្ដីពីនីតិវិធីបច្ចេកទេសនៃការរៀបចំគម្រោងថវិការបស់រដ្ឋបាលថ្នាក់ក្រោមជាតិសម្រាប់ការគ្រប់គ្រងឆ្នាំ ២០២៣ មានគោលបំណងកំណត់នូវក្របខ័ណ្ឌនិងវិធាននៃការបង្កើនប្រសិទ្ធិភាពនៃការប្រមូលចំណូល អាទិភាពចំណាយ និងគោលការណ៍សំខាន់ៗសម្រាប់បង្កើនប្រសិទ្ធភាពនៃការអនុវត្តគោលនយោបាយនៅថ្នាក់ក្រោមជាតិ ។
