រសៀលថ្ងៃព្រហស្បតិ៍ ១៥កើត ខែបុស្ស ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៥ ខែមករា ឆ្នាំ២០២៤ ឯកឧត្ដម គង់ គឹមនី អភិបាលរងខេត្ត តំណាងឯកឧត្តម វ៉ា ថន អភិបាលខេត្តក្រចេះ ដឹកនាំគណៈប្រតិភូខេត្ត អញ្ជើញចូលជួបសំដែងការគួរសម និងជូនពរ ឯកឧត្តម ង្វៀន ម៉ាញ់គ្រឿង លេខាគណៈកម្មាធិការបក្សខេត្តប៊ិញភឿក និងលោកជំទាវ ត្រើន ទ្វៀនមិញ អនុប្រធានគណៈកម្មាធិការប្រជាជនខេត្ត តំណាងលោកជំទាវប្រធានគណៈកម្មាធិការប្រជាជនខេត្ត ព្រមទាំងថ្នាក់ដឹកនាំ មន្ត្រីរាជការ និងប្រជាជនខេត្តប៊ិញភឿក ប្រទេសវៀតណាម ក្នុងឱកាសចូលឆ្នាំថ្មីប្រពៃណីជនជាតិវៀតណាម ឆ្នាំរោង ២០២៤ ដែលនិងឈានចូលមកដល់នាថ្ងៃទី១០-១១-១២ ខែកុម្ភៈ ឆ្នាំ២០២៤ខាងមុខនេះ ដែលជាខេត្តសម្ពន្ធ័មេត្រីភាព និងខេត្តក្រចេះ ដែលមានទំនាក់ទំនងសាមគ្គីភាព មិត្តភាពរវាងប្រទេសទាំងពីរ វៀតណាម-កម្ពុជា ។ ក្នុងឱកាសចូលជួបសំដែងការគួរសម និងជូនពរក៏មានការចូលរួមពី ថ្នាក់ដឹកនាំខេត្តចំនួន៥ រួមមានខេត្តស្ទឹងត្រែង ត្បូងឃ្មុំ កំពង់ចាម មណ្ឌលគីរី និងខេត្តកំពង់ធំ ។
ឯកឧត្តម គង់ គឹមនី អភិបាលរងខេត្ត តំណាងឯកឧត្តម វ៉ា ថន អភិបាលខេត្ត ក្នុងនាមក្រុមប្រឹក្សា គណៈអភិបាលខេត្ត មន្ត្រីរាជការ កងកម្លាំងប្រដាប់អាវុធ ព្រមទាំងប្រជាពលរដ្ឋទូទាំងខេត្តក្រចេះ បានប្រគល់លិខិតជូនពរក្នុងឱកាសចូលឆ្នាំថ្មីប្រពៃណីជនជាតិវៀតណាម ឆ្នាំរោង ២០២៤ និងសូមប្រសិទ្ធពរ បវរមហាប្រសើរ ជូនចំពោះថ្នាក់ដឹកនាំ បក្ស រដ្ឋ មន្ត្រីរាជការ កងកម្លាំងប្រដាប់អាវុធ និងប្រជាជនខេត្តប៊ិញភឿក សូមប្រកបនូវសុខភាពល្អបរិបូរណ៏ បញ្ញាញាណវៀងវៃ អាយុយឺនយូរ ដើម្បីបន្តដឹកនាំខេត្ត ឆ្ពោះទៅរកការអភិវឌ្ឍ ប្រកបដោយនិរន្តភាព និងភាពសម្បូររុងរឿងជានិច្ចនិរន្តន៍ ។
ក្នុងឱកាសនោះដែរ ឯកឧត្តម សៀក ឡេង តំណាងថ្នាក់ដឹកនាំខេត្តទាំង៦ ក៏បានមានប្រសាសន៍វាយតម្លៃខ្ពស់ ចំពោះការទំនាក់ទំនង កិច្ចសហប្រតិបត្តិការ លើគ្រប់វិស័យ ប្រកបដោយផ្លែផ្កាកន្លងមក ដែលនេះជាការឆ្លុះបញ្ចាំងនូវចំណងមិត្តភាព សាមគ្គីភាព ពីរមួយថ្ងៃទៅមួយថ្ងៃកាន់តែត្រូវបានពង្រឹង និងពង្រីកថែមទៀត នាពេលអនាគត ដើម្បីសន្តិភាព ស្ថេរភាព និងវិបុលភាពក្នុងតំបន់។
ឯកឧត្តម ង្វៀន ម៉ាញ់គ្រឿង លេខាគណៈកម្មាធិការបក្សខេត្តប៊ិញភឿក បានកោតសរសើរ ចំពោះលទ្ធផលការងារដែលខេត្តទាំង៦ សម្រេចបានក្នុងឆ្នាំចាស់កន្លងមក បានធ្វើអោយមានការអភិវឌ្ឍ រីកចំរើនលើគ្រប់វិស័យ ក្នុងនោះកិច្ចសហប្រតិបត្តិការ រវាងខេត្តទាំងពីរទទួលបានលទ្ធផលល្អប្រសើរ ដោយឈរលើស្មារតី សាមគ្គីភាពខ្ពស់ និងគោរពសិទ្ធគ្នាទៅវិញទៅមក ដើម្បីផលប្រយោជន៍ របស់ប្រជាជនយើងទាំងពីរ នាពេលអនាគត។