ទឹកទន្លេមេគង្គក្រចេះ ហក់ឡើងយ៉ាងខ្លាំងក្នុងរយៈពេលប៉ុន្មានថ្ងៃចុងក្រោយនេះ ធ្វើឲ្យស្ថានភាពកម្ពស់ទឹកទន្លេឡើងដល់ ២០.៨៩ម៉ែត្រ គិតត្រឹមតថ្ងៃទី០៤ ខែកញ្ញា ឆ្នាំ២០១៩ នេះ ខណៈដែលតម្រិតប្រកាសអាសន្ននៅកម្រិតកម្ពស់ ២២ម៉ែត្រ។
ដោយឡែក មានស្រុកចំនួនពីរ ក្នុងចំណោមស្រុកក្រុងទាំង៦នៃ ខេត្តក្រចេះ ដែលបានទទួលរងផលប៉ះពាល់ការបាក់ច្រាំងទន្លេ ។ ក្នុងនាមស្រុកឆ្លូង និងស្រុកព្រែកប្រសព្វ ។
យោងតាមការឲ្យដឹងពីអាជ្ញាធរស្រុកឆ្លូង បានឲ្យដឹងថា មានការបាក់ច្រាំងទន្លេរ និងមានការហូរច្រោះដាច់ផ្លូវ មានដូចជា នៅភូមិហាន់ជ័យទី ៣ ឃុំហាន់ជ័យ បាក់ ចំនួន ៥កន្លែង និងផ្លូវទៅភូមិបលង្គ័ នៅឃុំដំរីផុង ទឹកភ្លៀងហូរច្រោះដាច់ប្រវែង ១៥ម៉ែត្រ ។
ស្រុកព្រែកប្រសព្វ ទទួលរងផលប៉ះពាល់ការបាក់ច្រាំងទន្លេ ដោយលោក ហង្ស ចាន់ឌី អភិបាលស្រុកព្រែកប្រសព្វ បានឲ្យដឹងថា មានការបាក់ដីច្រាំងទន្លេ ប្រវែង ៣៥ម៉ែត្រ ស្ថិតនៅ ភូមិតាម៉ៅកណ្ដាល ឃុំតាម៉ៅ ស្រុកព្រែកប្រសព្វ ខេត្តក្រចេះ បណ្ដាលឲ្យប៉ះពាលផ្លូវលំប្រវែង ២ម៉ែត្រ ប៉ុន្តែមិនបង្កផលប៉ះពាល់ដល់ទ្រព្យសម្បត្តិ៍របស់បងប្អូនប្រជាពលរដ្ឋនោះឡើយ។ ដោយលោក បានបញ្ជាក់ថា បច្ចុប្បន្នលោកបានបញ្ជាឲ្យអាជ្ញាធរមូលដ្ឋានឃុំ បិតផ្លូវមាត់ទន្លេ ផ្អាក់ការធ្វើដំណើរបណ្ដោះអាសន្ន ដើម្បីការពារសុវត្ថិភាពជូនប្រជាពលរដ្ឋ ។
ដោយឡែក នៅតាមតំបន់ទំនាបមួយចំនួន ដូចជា នៅស្រុកចិត្របុរី និងស្រុកព្រែកប្រសព្វ បងប្អូនប្រជាពលរដ្ឋកំពុងជម្លៀសខ្លួន និងគោ ក្របី ទៅកាន់ទីទួលសុវត្ថិភាពជាបណ្តើរៗផង ។
ជាមួយគ្នានោះ លោក ហេង រត្ន័ម៉ូនីដា ប្រធានមន្ទីរធនធានទឹក និងឧតុនិយមខេត្ត ក្រចេះ បានឲ្យដឹងនៅព្រឹកថ្ងៃទី០៤ កញ្ញានេះថា ស្ថានភាពកម្រិតកម្ពស់ទឹកទន្លេមេគង្គ ក្រចេះ នៅស្ថានីយ៍ជលសាស្ត្រខេត្តក្រចេះ មានកម្ពស់ ២០.៨៩ម៉ែត្រ ដែលមានការហក់ឡើង គួរឲ្យគត់សម្គាល់ ។ ប៉ុន្តែទោះជាយ៉ាងណាក្តី ការកើនឡើងនៃកម្ពស់ទឹកទន្លេនេះ គឺជាកម្ពស់ មួយល្អ ធ្វើឲ្យទឹកហូរចូលអាង ស្ទឹង បឹង ព្រែកស្តុកទឹកទុក សម្រាប់បង្កើរបង្កើនផលស្រូវ រដូវវស្សា ។
លោក បានបញ្ជាក់ថា សម្រាប់ខេត្តក្រចេះ កម្រិតកម្ពស់ទឹកទន្លេមេគង្គក្រចេះ គឺប្រកាសអាសន្ននូវកម្រិតកម្ពស់ ២២ម៉ែត្រ ៕
