កំពង់ស្ពឺ ៖ សេចក្ដីរាយការមកថា សកម្មភាពកាយដីលក់នៅលើផ្ទៃបឹងសំរោងទង ស្ថិតនៅក្នុងភូមិសំរោងទង ឃុំសំរោងទង ស្រុកសំរោងទង ខេត្តកំពង់ស្ពឺ កាយដីលក់ជាងមួយឆ្នាំហើយមិនទាន់មានច្បាប់ពីមន្ទីរ ឬក្រសួងរ៉ែ និងថាមពលនៅឡើយ ខណៈម្ចាស់អាជីវកម្មនិយាយប្រាប់គេឯងថា ខ្លួនចាយប្រាក់រាប់សិបម៉ឺនដុល្លារជាមួយអ្នកដែលពាក់ព័ន្ធទើបអាចធ្វើការងារនេះបាន។
សេចក្ដីរាយការបានបន្តថា ផ្ទៃបឹងសំរោងទងទំហំរាប់សិបហិតា ជាបឹងធម្មជាតិពីបុរាណមកដែលពលរដ្ឋធ្លាប់អាស្រ័យផលត្រូវគេសហការជាប្រព័ន្ធក្រោមរូបភាពប្រជាពលរដ្ឋស្នើសុំស្ដាដើម្បីយកទឹកប្រើប្រាស់ ខណៈក្នុងភូមិសាស្ត្រនោះមានប្រព័ន្ធទឹកស្អាតចូលដល់ទៅហើយ។ដែលសកម្មភាពនេះត្រូវគេកើតជាចំងល់ព្រោះតែមានភាពមិនប្រកតីលើកិច្ចការនេះ។
កន្លងទៅមន្ត្រីជាន់ខ្ពស់នៅក្រសួងរ៉ែ និងថាមពល បានបញ្ជាក់ថា ការស្នើឱ្យស្ដាបឹង ស្រះ ឬក៏អាងត្រូវធ្វើឡើងត្រឹមកំរិតមួយដោយមិនមានការជួញដូរដូចនេះទេ ពោលគឺអាចម៌ដីត្រូវយកមអភិវឌ្ឍន៍នៅជុំវិញកន្លែងស្ដា ឬក៏ក្នុងមូលដ្ឋាននោះ តែបើយកអាចម៌ដីលក់នៅខាងក្រៅស្មើនឹងធ្វើអាជីវកម្ម អ៉ីចឹងទេអ្នកម៉ៅការត្រូវគោរពកាតព្វកិច្ចសុំច្បាប់ពីក្រសួងរ៉ែ ហើយបង់សួយសា(ពន្ធ) នោះជំនាញនិងធ្វើការទូទាត់ទៅលើការចំណាយអាចម៉ដីក្នុងការអភិវឌ្ឍន៍ថាចំណាយទំហំណា គុណគូចំនួនអាចម៌ដីទៅនឹងទិដ្ឋភាពជាក់ស្ដែង ក្រៅពីនោះគឺត្រូវគោរពកាតព្វបង់សួយសាតាមនីតិវិធី។
ទាក់ទងនឹងករណីនេះលោក ប៊ុន ថេត ប្រធានការិយាល័យរ៉ែ និងថាមពល ខេត្តកំពង់ស្ពឺបានឱ្យដឹងថា សកម្មភាពខាងលើម្ចាស់អាជីវកម្មមិនទាន់បំពេញនីតិវិធីពេញលេញនៅឡើយ ពោលគឺកាយដីយូរហើយតែមិនបង់ពន្ធ តែខាងជំនាញរ៉ែ កំពុងតែរៀបចំឱ្យម្ចាស់អាជីវកម្មមកបំពេញកាតព្វកិច្ច។ ព្រោះជំនាញរ៉ែកន្លងទៅដឹងឮថា ត្រឹមពលរដ្ឋសុំស្ដាបឹងប៉ុណ្ណោះ។
ចំណែកលោក ញ៉ាញ់ ជាហ័ង ប្រធានមន្ទីរធនធានទឹក និងឧតុនិយមខេត្តបានឱ្យដឹងថា ខាងលោកបានអនុញ្ញាតឱ្យស្ដាត្រឹមកំរិត៨ម៉ែត្រ តាមការស្នើសុំត្រឹមកំរិតស្ដាបឹងជូនអ្នកភូមិ តែបើការធ្វើខុសកំណត់ជម្រៅលោកនឹងមានវិធានការ។ ហើយសម្រាប់ការកាយអាចម៌ដីលក់ធ្វើអាជីវកម្មនោះត្រូវគោរពនីតិវិធីខាងជំនាញរ៉ែ និងថាមពល មិនពាក់ព័ន្ធនឹងជំនាញលោកទេ។
ដោយឡែកលោក សាន ម្ចាស់អាជីវកម្មខាងលើយើងខ្ញុំមិនទាន់សុំការបញ្ជាក់បាននៅឡើយ ព្រោះផ្ញើសំនួរទៅកាន់លេខទូរសព្ទដៃរបស់លោកចំនួន២ដង មិនមាននូវការឆ្លើយតប៕
