ក្រុងកោះរ៉ុង ៖ ទីបំផុតទៅស្ត្រីជនជាតិអង់គ្លេសម្នាក់ឈ្មោះAmelia Bambridge អាយុ២១ឆ្នាំ ដែលបាត់ខ្លួននៅកោះរ៉ុងជាងមួយសប្តាហ៍កន្លងមកនេះ នាងបានស្លាប់ទៅហើយ ក្រោយពីសមត្ថកិច្ចដែលចុះតាមស្វែងរក បានប្រទះឃើញសាកសពស្ត្រីរងគ្រោះអណ្តែត នៅលើលម្ហសមុទ្រក្នុងភូមិសាស្ត្រស្រុកកោះស្តេច ចម្ងាយពីកោះរ៉ុង ប្រមាណជាង៤០ម៉ាយ នារសៀលថ្ងៃ៣១តុលា២០១៩នេះ ។
ភ្លាមៗក្រោយរកឃើញ សាកសពត្រូវបានសមត្ថកិច្ចរៀបចំដឹកជញ្ជូននាំមកកាន់កំពង់ផែក្រុងព្រះសីហនុដើម្បីធ្វើការងារបន្តតាមនិតិវិធី។
មន្ត្រីកងទ័ពជើងទឹកនៅក្នុងទីបញ្ជាការជួរមុខគណកម្មាធិការជាតិសន្តិសុខលម្ហសមុទ្រអោយPNN ដឹងថា សាកសពស្ត្រីរងគ្រោះត្រូវបានកម្លាំងទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ ក្រោមកិច្ចសហការជាមួយ ក្រុមហ៊ុន ជី ធី វី ស៊ី ស្ពីតប៊ូត កម្ពុជា របស់លោកឧកញ៉ាទៀ វិចិត្រ បានប្រទះឃើញសាកសពស្ដ្រីជនជាតិអង់គ្លេសឈ្មោះ Amelia Bambridge រូបនេះ អណ្ដែតនៅលើផ្ទៃសមុទ្រនៅចំណុច( ខន ដរ ) ក្បែរព្រំដែនសមុទ្រកម្ពុជា ថៃ ។
ទោះជាយ៉ាងនេះក្តី ភ្លាមៗក្រោយទទួលដំណឹងថាសាកសពត្រូវបានរកឃើញហើយនោះ ក្រុមអ្នករាយការណ៍ព័ត៌មាននៅមិនទាន់ទទួលបានរបាយការណ៍ពីសមត្ថកិច្ចជំនាញអំពីការស្លាប់របស់ស្ត្រីរងគ្រោះថាបណ្តាលមកពីមូលហេតុអ្វីនៅឡើយទេ ដោយរងចាំសមត្ថកិច្ចធ្វេីកោសល្យវិច័យ៕
