ស្រុកអង្គស្នួល៖ នាព្រឹកថ្ងៃទី៨ ខែឧសភា ឆ្នាំ២០២៥ លោក នូ សុវណ្ណរិទ្ធ អភិបាល នៃគណៈអភិបាលស្រុកអង្គស្នួល បានអញ្ជើញចូលរួមអមដំណើរ ឯកឧត្ដម ប៊ុន ផេង អភិបាលរង នៃគណៈអភិបាលខេត្ដកណ្ដាល នៃគណៈអភិបាលខេត្ដកណ្ដាល តំណាងដ៏ខ្ពង់ខ្ពស់ ឯកឧត្ដម គួច ចំរើន អភិបាល នៃគណៈអភិបាលខេត្ដកណ្ដាល អញ្ជើញជាអធិបតីភាពក្នុងពិធីបិទផ្សាយជាសាធារណៈ នូវឯកសារនៃការវិនិច្ឆ័យក្បាលដីចុះបញ្ជីដីមានលក្ខណៈជាប្រព័ន្ធក្នុងតំបន់វិនិច្ឆ័យ ១៧ភូមិ នៃឃុំម្កាក់ ឃុំព្រៃពួច និងឃុំដំណាក់អំពិល ស្រុកអង្គស្នួល ខេត្ដកណ្ដាល ដែលមានក្បាលដីសរុបចំនួន ១០,៤៣៤ក្បាលដី។
ការបិទផ្សាយនេះធ្វើឡើងក្នុងកំឡុងពេល ១៥ថ្ងៃ ថ្ងៃទី៨ ខែឧសភា ឆ្នាំ២០២៥ ដល់ថ្ងៃទី២២ ខែឧសភា ឆ្នាំ២០២៥ នៅបរិវេណវត្ដដំណាក់អំពិល ស្ថិតក្នុងភូមិដំណាក់អំពិល ឃុំដំណាក់អំពិល ស្រុកអង្គស្នួល ខេត្តកណ្តាល។
គោលបំណងដ៏សំខាន់នៃការបិទផ្សាយជាសាធារណៈគឺ ដើម្បីធានាបាននូវទិន្នន័យអោយមានលក្ខណៈត្រឹមត្រូវស្របច្បាប់ ដោយក្នុងកំឡុងពេលនេះ អ្នកកាន់កាប់ដី ឬអ្នកពាក់ព័ន្ធទាំងឡាយ អាច ស្នើសុំកែតម្រូវ ឬជំទាស់តវ៉ា លើទិន្នន័យបិទផ្សាយក្នុងករណីដែលមានខុសចំណុចណាមួយ៕
