សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃកម្ពុជា បានស្នើឱ្យកងកម្លាំងប្រដាប់អាវុធគ្រប់ប្រភេទ ត្រូវមានការអត់ធ្មត់ ក្នុងពេលរង់ចាំការដោះស្រាយ ពាក់ព័ន្ធបញ្ហានៅមុំ៣ ប្រាសាទតាមាន់ធំ ប្រាសាទតាមាន់តូច តាក្របី តែក៏ត្រូវត្រៀមខ្លួនវាយបកគ្រប់ទម្រង់នៃការឈ្លានពាន។
តាមរយៈការបង្ហោះសារតាមបណ្តាញសង្គមហ្វេសប៊ុកនារាត្រីថ្ងៃទី១ ខែមិថុនា ឆ្នាំ២០២៥នេះ សម្តេចតេជោ បានប្រកាសគាំទ្រទាំងស្រុង ក្រោយនាយករដ្ឋមន្ត្រីកម្ពុជា សម្តេចបវរធិបតី ហ៊ុន ម៉ាណែត បញ្ជាក់ថា នឹងយកបញ្ហានៅមុំ៣ បញ្ហាប្រាសាទតាមាន់ធំ ប្រាសាទតាមាន់តូច តាក្របី ទៅកាន់តុលាការយុត្តិធម៌អន្តរជាតិ (ICJ) តែម្តង។
សម្តេចតេជោ ប្រធានព្រឹទ្ធសភា បានគូសរំលេចថា MOU ឆ្នាំ២០០០ ហាក់ទៅមុខមិនរួច ដែលបង្កឲ្យមានភាពមិនច្បាស់លាស់រហូតចោទប្រកាន់គ្នា និងជម្លោះប្រដាប់អាវុធច្រើនដងមកហើយ។
សម្តេចតេជោ បានបន្តថា ប្រសិនភាគីថៃមានចិត្តស្មោះត្រង់ចង់ដោះស្រាយពិតប្រាកដ គួរតែឯកភាពដឹកដៃគ្នាទៅឱ្យតុលាការជួយកាត់សេចក្តីតែម្តង មិនចាំបាច់កម្ពុជាប្តឹងនោះទេ។
តាមរយៈសារខាងលើ សម្តេច ប្រធានព្រឹទ្ធសភា បានសង្កត់ធ្ងន់ថា « យើងរង់ចាំមើលឥរិយាបទរបស់ថៃលើចំណុចនេះ តើហ៊ាន ឬមិនហ៊ាន?»៕
