ក្រោយការឈ្លានពានយ៉ាងគឃ្លើនរបស់កងទ័ពថៃ មកលើអធិបតេយ្យភាពកម្ពុជា និងការវាយប្រហារគ្នារយៈពេល៥ថ្ងៃមកនេះ មានពលករកម្ពុជាយ៉ាងហោចណាស់ប្រមាណជិត៤០ម៉ឺននាក់ បានកំពុងនាំគ្នាសម្រុកមកកាន់ប្រទេសកម្ពុជាវិញ។
ថ្លែងក្នុងសន្និសីទសារព័ត៌មានស្តីពីបច្ចុប្បន្នភាពនៃការឈ្លានពានរបស់កងទ័ពថៃមកលើទឹកដីកម្ពុជា នាព្រឹកថ្ងៃទី២៨ ខែកក្កដា ឆ្នាំ២០២៥ លោកជំទាវឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិបានបញ្ជាក់ថា៖ «ត្រង់ចំណុចនេះយើងក៏បានទទួលសេចក្តីរាយការណ៍ជាច្រើនពាក់ព័ន្ធនឹងការវាយដំ ធ្វើបាប គំរាមកំហែង ពីសំណាក់ក្រុមជ្រុលនិយមជនជាតិថៃ មកលើប្រជាពលរដ្ឋស្លូតត្រង់ដែលជាពលករកម្ពុជា ។ នេះជាទង្វើអមនុស្សធម៌ ខុសច្បាប់និងមិនអាចអត់ឱនឱ្យបានសោះឡើយ»។ លោកជំទាវឧត្តមសេនីយ៍ឯកបានលើកឡើងថា ចាប់តាំងតែពីថ្ងៃទី ២៤ ខែ កក្កដា ដល់ថ្ងៃទី ២៧ ខែកក្កដា ឆ្នាំ ២០២៥មានពលករខ្មែរបានវិលត្រឡប់មកប្រទេសកម្ពុជាវិញចំនួន ២០៣ ៧០៦ នាក់។ លោកជំទាវឧត្តមសេនីយ៍ឯកបានបញ្ជាក់បន្ថែមថា កាលពីថ្ងៃម្សិលមិញមានពលរដ្ឋខ្មែរចំនួន ១២០ ៤៣៨ នាក់ ដែលបានវិលចូលប្រទេសកម្ពុជាវិញ ហើយសម្រាប់ថ្ងៃនេះ យើងរំពឹងថានឹងមានការវិលត្រឡប់របស់ពលករកម្ពុជាពីប្រទេសថៃមកកម្ពូជាវិញប្រមាណ១៥ម៉ឺននាក់។ លោកជំទាវឧត្តមសេនីយ៍ឯក អ្នកនាំពាក្យក្រសួងការពារជាតិកម្ពុជាបានបញ្ជាក់ឱ្យដឹងទៀតថា ក្នុងរយៈ៥ថ្ងៃ ពលករកម្ពុជាបានវិលត្រឡប់មកកម្ពុជាវិញប្រមាណ៤០ម៉ឺននាក់ ហើយចំនួននេះនឹងកើនឡើងបន្ថែមទៀតប្រសិនបើការប្រយុទ្ធគ្នារវាងកងទ័ពថៃនៅតែបន្ត។
លោកជំទាវឧត្តមសេនីយ៍ឯកបានបញ្ជាក់ឱ្យដឹងផងដែរថា ក្រសួងការពារជាតិកម្ពុជាក៏សូមធ្វើការអំពាវនាវដល់អាជ្ញាធរថៃ ចាត់វិធានការជាបន្ទាន់ដើម្បីការពារប្រជាពលរដ្ឋខ្មែរនៅទីនោះ ក៏ដូចជាចាប់ជនល្មើសឱ្យមកទទួលខុសត្រូវចំពោះមុខច្បាប់ ដែលជាអំពើឧក្រិដ្ឋរបស់ខ្លួនដោយផ្តល់នូវយុត្តិធម៌ និងតម្លាភាពជូនពលករកម្ពុជា។
យោងតាមរបាយការណ៍របស់ក្រសួងការងារនិងបណ្តុះបណ្តាលវិជ្ជាជីវៈបានឱ្យដឹងថា ចាប់តាំងពីថ្ងៃទី២៤ ខែកក្កដា រហូតមកដល់ថ្ងៃទី២៧ ខែកក្កដា ឆ្នាំ២០២៥ ពលករខ្មែរបានវិលត្រឡប់ពីប្រទេសថៃវិញមានចំនួនប្រមាណ ២០៣ ៧០៦ នាក់ ដោយឡែកកាលពីថ្ងៃម្សិលមិញមានពលរដ្ឋខ្មែរចំនួន ១២០ ៤៣៨ នាក់ដែលបានវិលចូលប្រទេសកម្ពុជាវិញ។
នៅថ្ងៃនេះ រំពឹងថានឹងមានពលករវិលត្រឡប់ពីប្រទេសថៃមកកម្ពុជាប្រមាណជាង ១៥ម៉ឺននាក់។
ដូច្នេះក្នុងរយៈពេល ៥ ថ្ងៃនេះ ពលករខ្មែរបានវិលត្រឡប់មកកាន់កម្ពុជាវិញប្រមាណជិត ៤០ ម៉ឺននាក់ ហើយចំនួននេះ នឹងត្រូវកើនឡើងបន្ថែមទៀត ប្រសិនបើការប្រយុទ្ធគ្នានៅតែបន្ត។
គិតត្រឹមថ្ងៃទី២៧ ខែកក្កដា ឆ្នាំ២០២៥ ជនភៀសសឹកដែលបានជម្លៀសមកទីទួលសុវត្ថិភាព និងផ្ទះសាច់ញាតិមានចំនួន ៤ ខេត្ត មានចំនួនសរុប ៣៩ ៨២៨ គ្រួសារស្មើនឹង ១៣៤ ៧០៧ នាក់ ដោយរាប់ទាំងកុមារ ស្ត្រីមានផ្ទៃពោះ ចាស់ជរា និងជនពិការ ។
