ព្រឹកថ្ងៃទី២៧ ខែកក្តកដាឆ្នាំ២០២៥ ឯកឧត្តមនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ព្រមទាំងថ្នាក់ដឹកនាំកងទ័ពជាច្រើរូបបានអញ្ជើញ បំពាក់ឋានន្តរសក្តិថ្នាក់ឧត្តមសេនីយ៍ឯក ជាកិច្ចបច្ឆាមរណៈ និងបំពាក់គ្រឿងឥសរិយសមេដៃការពារជាតិថ្នាក់មាសជូនសព ឯកឧត្តម ឧត្តមសេនីយ៍ទោ ដួង សំនៀង មេបញ្ជាការ កងពលតូចអន្តរាគមន៍លេខ៧ កងពលធំ អន្តរាគមន៍លេខ៣ កងទ័ពជើងគោកដែលបានពលីជីវិតកាលពីថ្ងៃសៅរ៍ ១កើត ខែស្រាពណ៍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៦ ខែកក្កដា ឆ្នាំ២០២៥ វេលាម៉ោង ១៣:១០នាទីរសៀល ក្នុងជន្មាយុ ៦៧ឆ្នាំដែលបានពលីជីវិតក្នុងបុព្វហេតុប្រយុទ្ធលើសមរភូមិជាមួយចោសៀមឈ្លានពាន ដើម្បីការពារបូរណភាពទឹកដីព្រះរាជា ណាចក្រកម្ពុជា ។
អញ្ជើញ បំពាក់ឋានន្តរសក្តិថ្នាក់ឧត្តមសេនីយ៍ឯក ជាកិច្ចបច្ឆាមរណៈ និងបំពាក់គ្រឿងឥសរិយសមេដៃការពារជាតិថ្នាក់មាសជូនសព ឯកឧត្តម ឧត្តមសេនីយ៍ឯក ដួង សំនៀង ធ្វើឡើងនៅទីតាំងតម្កល់សពធ្វើបុណ្យ ទក្ខិណានុប្បទាននៅវត្តនិរោធរង្សី សង្កាត់និរោធ ខណ្ឌច្បារអំពៅ រាជធានីភ្នំពេញ។
ស្ថិតក្នុងមរណទុក្ខដ៏ក្រៀមក្រំនេះ ឯកឧត្តមនាយឧត្តមសេនីយ៍ ទៀ សីហា ឧបនាយករដ្ឋមន្ត្រី បានចារ្យលើលិខិតរំលែកទុក្ខ ជូនគ្រួសារនៃសព។
ថ្នាក់ដឹកនាំ នាយទាហាន នាយ-ទាហានរង និងពលទាហាន ក៏ដូចគណៈប្រតិភូតាមបណ្ដាស្ថាប័នទាំងអស់របស់រដ្ឋ ដែលបានអញ្ជើញមកគោរពវិញ្ញាណក្ខន្ធសព ឯកឧត្តម ឧត្តមសេនីយ៍ឯក ដួង សំនៀង មេបញ្ជាការ កងពលតូចអន្តរាគមន៍លេខ៧ បានសម្តែងនូវសមានចិត្តដ៏ក្តុកក្តួលចូលរួមរំលែកមរណទុក្ខយ៉ាងក្រៀមក្រំបំផុត ចំពោះការបាត់បង់ដ៏ធំធេងនេះជាមួយក្រុមគ្រួសារនៃសពទាំងមូល ដោយសេចក្តីសង្វេគជាទីបំផុត។
មរណភាពរបស់ឯកឧត្តម ឧត្តមសេនីយ៍ឯកដួងសំនៀង មិនត្រឹមតែជាការបាត់បង់នូវឪពុក ឪពុកក្មេក ជីតាជាទីគោរពស្រលាញ់ដ៏ជ្រាលជ្រៅ និងប្រកបដោយព្រហ្មវិហារធម៌ដ៏ខ្ពង់ខ្ពស់ចំពោះក្រុមគ្រួសារប៉ុណ្ណោះទេ ប៉ុន្តែគឺជាការ បាត់បង់នាយទាហានជាន់ខ្ពស់ដ៏ឆ្នើមមួយរូប របស់កម្ពុជា ដែលបានធ្វើពលីកម្មគ្រប់បែបយ៉ាងប្រកបដោយឆន្ទៈមនសិការដ៏មោះមុត ក្នុងបុព្វ ហេតុបម្រើ ជាតិ សាសនា ព្រះមហាក្សត្រ និងបានការពារបូរណភាពទឹកដីជារៀងរហូតមក។
ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី និងថ្នាក់ដឹកនាំ នាយទាហាន នាយ-ទាហានរង និងពលទាហាន ក៏ដូចគណៈប្រតិភូតាមបណ្ដាស្ថាប័នទាំងអស់របស់រដ្ខ បានបួងសួង ដល់វត្ថុស័ក្តិសិទ្ធិក្នុងលោក និងតេជះបារមីនៃព្រះពុទ្ធ ព្រះធម៌ ព្រះសង្ឃ សូមតាមបីបាច់ថែរក្សាដល់ដួងវិញ្ញាណក្ខន្ធ របស់ឯកឧត្តម ឧត្តមសេនីយ៍ឯកដួងសំនៀងសូមបានដល់ឋានបរមសុខ ក្នុង សុគតិភពគ្រប់ៗជាតិ កុំបីឃ្លៀងឃ្លាតឡើយ។
សពរបស់ឯកឧត្តម ឧត្តមសេនីយ៍ឯក ដួង សំនៀងតម្កល់ធ្វើបុណ្យ ទក្ខិណានុប្បទាននៅវត្តនិរោធរង្សី សង្កាត់និរោធ ខណ្ឌច្បារអំពៅ រាជធានីភ្នំពេញ រហូតដល់ថ្ងៃទី៣០ខែកក្កដា៕
