ព្រៃវែង ៖ប្រភពពីប្រជាពលរដ្ឋបានបញ្ជាក់ឲ្យដឹងថា កាស៊ីណូគ្មានស្លាកយីហោដែលមានរបងជញ្ជាំងសង្ក័សីពណ៌ខៀវ បង្កប់ល្បែងស៊ីសងមាន់ជល់បៀអាប៉ោងយូគីនិងល្បែងជាច្រើនប្រភេទទៀតបើកអោយក្រុមញៀនល្បែងដែលពលរដ្ឋខ្មែរ និងជនអន្តោប្រវេសន៍វៀតណាមឆ្លងដែនចេញចូលលេងស៊ីសងខុសច្បាប់ យ៉ាងគគ្រឹកគគ្រេង ចំណែកឯសមត្ថកិច្ចមូលដ្ឋាននិងមេច្រកទ្វារព្រំដែនអន្តរជាតិបន្ទាយចក្រី រក្សាភាពស្ងៀមស្ងាត់ មិនហ៊ានចាត់ វិធានការទប់ស្កាត់និងបង្ក្រាបនោះទេ ។
ប្រភពប្រជាពលរដ្ឋរស់នៅក្នុងភូមិគោ ឃុំបន្ទាយចក្រី ស្រុកព្រះស្តេច បានបន្តឲ្យដឹងថា កាស៊ីណូដែលគ្មានស្លាកយីហោមួយកន្លែងនេះ នៅតែបន្តបើកដំណើរការឲ្យពលរដ្ឋខ្មែរចេញចូលលេងល្បែងសុីសងភ្នាល់ដាក់លុយខុសច្បាប់ បង្កប់ដូចជា ជល់មាន់ បៀរ អាប៉ោង និងល្បែងជាច្រើនប្រភេទទៀតយ៉ាងគគ្រឹកគគ្រេង រីឯអាជ្ញាធរនិងសមត្ថកិច្ច មូលដ្ឋានរក្សាភាពស្ងៀមស្ងាត់ ។ ដែលបញ្ហានេះ ធ្វើអោយប្រជាពលរដ្ឋនៅក្នុងមូលដ្ឋានមានការព្រួយបារម្ភយ៉ាងខ្លាំងបញ្ហាអសន្តិសុខ សង្គមនិងអំពើចោរកម្មចោរលួច ចោរឆក់ ចោរប្លន់ ចោរគាស់ផ្ទះ គ្រឿងញៀននិងប្រើអំពើហិង្សាគ្រួសារជាដើមចមកើតចេញពីល្បែងសុីសងនេះឯង។
ហេតុនេះហើយទើបប្រជាពលរដ្ឋមូលដ្ឋានខាងលើស្នើរសុំដល់ឯកឧត្តម សួន សុម៉ាលីន អភិបាលខេត្តព្រៃវែង និងឧត្តមសេនីយ៍ទោ ឈឿន ប៊ុនឆន ស្នងការដ្ឋាននគរបាលខេត្តព្រៃវែង មិនគួរមើលរំលងភាពអសកម្មលោក ភុន សម្ផស្ស អភិបាល ស្រុកព្រះស្តេច និងលោក ជៃ សេងហ៊ាង អធិកា រដ្ឋាននគរបាលស្រុកព្រះស្ដេច ដែលបណ្តោយឲ្យមានល្បែងជល់មាន់ ទ្រង់ទ្រាយធំ បង្កប់ក្នុងកាស៊ីណូរបងជញ្ជាំងសង្ក័សីពណ៌ខៀវបើកឲ្យពលរដ្ឋ ខ្មែរ ចេញចូលលេងល្បែង យ៉ាងគំហ៊ុក មិនហ៊ានធ្វើការបង្ក្រាប ។
ដូច្នេះប្រជាពលរដ្ឋរស់នៅភូមិគោ ឃុំបន្ទាយចក្រី ស្រុកព្រះស្តេច ខេត្តព្រៃវែងសូមអំពាវនាវដល់ ថ្នាក់ដឹកនាំក្រសួងមហាផ្ទៃ ជាពិសេស នាយឧត្តមសេនីយ៍ ស ថេត អគ្គស្នងការនគរបាលជាតិ មេត្តាជួយចាត់មន្ត្រីពាក់ព័ន្ធក្នុងខេត្តព្រៃវែង ចុះពិនិត្យទប់ស្កាត់ និងបង្ក្រាបអោយមានប្រសិទ្ធភាពស្របតាមគោលនយោបាយភូមិ ឃុំ សង្កាត់ មានសុវត្ថិភាពទាំង៧ចំណុចដែលរាជរដ្ឋាភិបាលបានដាក់ចេញដោយក្រសួងមហាផ្ទៃ ដើម្បី ពង្រឹង សន្តិសុខ សង្គម ជូនប្រជាពលរដ្ឋក្នុងមូលដ្ឋាន៕
