ខេត្តកំពង់ស្ពឺ៖ នាព្រឹកថ្ងៃអាទិត្យ ១៣កើត ខែអស្សុជ ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី៥ ខែតុលា ឆ្នាំ២០២៥ នេះ ដោយបានការចង្អុលណែនាំនិងបញ្ជាដ៏ខ្ពង់ខ្ពស់ ពីឯកឧត្ថម នាយឧត្ដមសេនីយ៍ ស ថេត អគ្គស្នងការនគរបាលជាតិ លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ បានដឹកនាំនិងនាំយកថវិកាឯកឧត្ដម នាយឧត្ដមសេនីយ៍ ចំនួន ១០,០០០,០០០ រៀល ” ដប់លានរៀល ” យក ទៅចូលរួមចំណែកក្នុងពិធីបុណមយសពជនរងគ្រោះឈ្មោះផាន រ៉ាយុ ភេទប្រុស អាយុ១៧ឆ្នាំ រស់នៅភូមិព្រៃស្រូល ឃុំពោធិ៍អង្គ្រង ស្រុកបសេដ្ឋ ខេត្ដកំពង់ស្ពឺ ដែលបានរងគ្រោះ ថ្នាក់ដោយសារតែគ្រាប់កាំភ្លេីងរបស់លោកនាយប៉ុស្ដិ៍នគរបាលរដ្ឋបាលពោធិ៍អង្គ្រង កាលពីយប់ថៃ្ងទី៣ខែតុលាឆ្នាំ២០២៥កន្លងទៅក្នុងពេលចុះបំពេញបេសកកម្មល្បាតនៅក្នុងភូមិសាស្ដ្ររបស់ខ្លួនលេីការរក្សាសន្ដិសុខសណ្ដាប់ធ្នាប់សុវត្ថិភាពសាធារណៈសង្គម។
នាឱកាសអញ្ជេីញចុះសួរសុខទុក្ខនិងការចូលរួមសោកស្ដាយជាពន់ពេកជាមួយក្រុមគ្រួសារនៃសពក្មួយប្រុស ផាន រ៉ាយុ លោកឧត្ដមសេនីយ៍ស្នងការនគរបាលខេត្ដបាននាំយកការផ្ដាំផ្ញេីសាកសួរសុខទុក្ខនិងការចូលរួមរំលែកទុក្ខដ៏ក្រៀមក្រំពីសំណាក់ឯកឧត្ដម នាយឧត្ដមសេនីយ៍ អគ្គស្នងការនគរបាលជាតិ ចំពោះការបាត់បង់អាយុជីវិតកូនក្មួយចៅជាទីស្រឡាញ់ពីសំណាក់សាច់ញាតិក្រុមគ្រួសារនិងបងប្អូនប្រជាពលរដ្ឋទាំងអស់ដែលជាអ្នករស់នៅភូមិផងបងជាមួយនិងជាការសោកស្ដាយមិនអាចយកអវីមកព្រៀបផ្ទឹមបានចំពោះមរណភាពនេះ។
ក្នុងជាមន្ដ្រីអនុវត្ដច្បាប់និងក្នុងជាប្រធានស្ថាប័ន ស្នងការដ្ឋាននគរបាលខេត្ដកំពង់ស្ពឺ អធិការដ្ឋាននគរបាលស្រុកបសេដ្ឋ សូមចូលរួមសាមនទុក្ខជាមួយក្រុមគ្រួសារសពនិងប្ដេជ្ញាថានិងយកជាពិសោធន៍សម្រាប់ការបំពេញភារកិច្ចរបស់កងកម្លាំងនគរបាលជាតិទាំងមូលនិងសូមការអធ្យាស្រ័យសុំទោសពីក្រុមគ្រួសារនិងសន្យាថានឹងផ្ដល់យុត្ដិធម៌ជូនក្រុមគ្រួសារសពនិងក្មួយប្រុស ផាន រ៉ាយុ ទៅតាមអំពើនិងកំហុសដែលកើតឡើងតាមប្រព័ន្ធច្បាប់ ព្រះរាជាណាចក្រកម្ពុជាអោយបានភាពសុក្រឹតនិងតម្លាភាពសម្រាប់ជនរងគ្រោះ។
ជាចុងក្រោយលោកឧត្ដមសេនីយ៍ស្នងការសូមចូលរួមជាទឹកចិត្ដមិនអាចកាត់ថ្លៃបាននិងធានាថាយុត្ដិធម៌ត្រូវតែកើតមានចំពោះសកម្មភាពដែលបង្កឡើង ដោយមន្ដ្រីនគរបាលប៉ុស្ដិ៍ពោធិអង្គ្រង នៃអធិការដ្ឋានគរបាលស្រុកបសេដ្ឋនេះ និងយកជាគំរូរសម្រាប់ជាមេរៀនចែករំលែកបន្ដទៅតាមបណ្ដាប៉ុស្ដិ៍នគរបាលនៅទូទាំងខេត្ដកំពង់ស្ពឺ ទាំង៨៨ ៕
