ខេត្តឧត្ដរមានជ័យ ៖ សមត្ថកិច្ចជំនាញ នៅស្រុកអន្លង់វែង ខេត្តឧត្ដរមានជ័យ ហាក់ដូចជាមានការបិទបាំង រឿងឈូសឆាយដីព្រៃឈើស្រោងទ្រុឌទ្រុល ដែលពុងធ្វើកម្មភាពឈូសឆាយ ១០០ហិកតា នៅភូមិត្រពាំងធំ និងភូមិស្រឡៅស្រោង ឃុំលំទង ស្រុកអន្លង់វែង ខេត្តឧត្ដរមានជ័យ ។
អស់រយៈពេលជាច្រើនថ្ងៃមកហើយ រហូតមកដល់ថ្ងៃទី៥ ខែកុម្ភៈ ឆ្នាំ២០២០នេះ សមត្ថកិច្ចជំនាញរដ្ឋបាលព្រៃឈើ មិនទាន់ទទួលបានច្បាប់ឈូសឆាយនៅឡើយទេ ទទួលបានតែលិខិតលក់ទិញដីធ្លីតែប៉ុណ្ណោះ។
បើតាមសមត្ថកិច្ចម្នាក់ បានអោយដឹងថា ដីព្រៃឈើដែលកំពុងតែឈូសឆាយ ជារបស់ឧកញ៉ាម្នាក់ និងមានតួនាទីជាប្រធានសភាពាណិជ្ជកម្ម នៅខេត្តសៀមរាប ដែលបានទិញដីនោះ។
លោក គង់ សារ៉េត នាយសង្កាត់រដ្ឋបាលព្រៃឈើអន្លង់វែង បានអោយដឹងថា លោកបានទទួលតែលិខិតលក់ទិញដី មិនទាន់ទទួលបានច្បាប់ឈូសឆាយព្រៃទេ លោកថា ច្បាប់ឈូសឆាយនៅចៅហ្វាយស្រុក។
លោក ហោ ជិនវីរ:យុទ្ធ អភិបាលស្រុកអន្លង់វែង បានអោយដឹងថា លោកមិនបានដឹងទេ ព្រោះគ្មានរបាយការណ៍ណាមួយមកដល់លោក។
លោក សូត្រ ស៊ីសុខឃាង ប្រធានមន្ទីរកសិកម្មខេត្តឧត្ដរមានជ័យ បានអោយដឹងថា ចាប់តាំងពីកំលាំងជំនាញរដ្ឋបាលព្រៃឈើចុះទៅពិនិត្យ នៅថ្ងៃទី៣១ ខែមករា រហូតមកដល់ពេលនេះ លោកមិនទាន់ទទួលបានរបាយការណ៍ ឬសេចក្ដីរាយការណ៍ណាមួយឡើយ។ សមត្ថកិច្ចម្នាក់ បានអោយដឹងថា ក្នុងរឿងហាក់ដូចជាមានការបិទបាំងខ្លាំងណាស់ សង្ស័យមានការពាក់ព័ន្ធជាសង្កាត់រដ្ឋបាលព្រៃឈើទៀតផង៕ ប៉ែន នួន
