ខេត្តក្រចេះ ៖ ថ្នាក់ដឹកនាំខេត្តក្រចេះ ប្រារព្វខួបលើកទី ១០៩ ទិវាអន្តរជាតិ ៨ មីនា ២០២០
ថ្នាក់ដឹកនាំខេត្តគ្រប់លំដាប់ថ្នាក់ជានារី បានប្រារព្វខួបលើកទី ១០៩ ទីវាអន្តរជាតិ ៨ មីនា ២០២០ ក្រោមប្រធានបទ “ មានសន្តិភាព មានការលើកកម្ពស់សមភាពយេនឌ័រ ” អញ្ជើញជាអធិបតីក្នុងពិធីអបអរសាទរខួបអនុស្សាវរីនេះ មានឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្ត និងលោកជំទាវ និងឯកឧត្តម វ៉ា ថន អភិបាលនៃ គណៈអភិបាលខេត្ត និងលោកជំទាវ នៅព្រឹកថ្ងៃទី ០៤ មីនា ២០២០ ។
នៅក្នុងឱកាសនោះ លោកស្រី ខាំ សុភាព អភិបាលរងខេត្ត និងជាប្រធានគណៈកម្មការសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្ត បានអានព្រះរាជសារ សម្តេចព្រះមហាក្សត្រី នរោត្តម មុនីនាថ សីហនុ ព្រះ វរាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ក្រោមប្រធានបទ “ មានសន្តិភាព មានការលើកកម្ពស់សមភាពយេនឌ័រ ” ជូនដល់អង្គពិធី ដោយបញ្ជាក់ពីសេចក្តីក្លាហាន និងការខិតខំតស៊ូរបស់បុព្វបុរសជាស្ត្រីទូទាំងសកលលោក ដើម្បីសិទ្ធិ សេរីភាព និងតួនាទី ស្មើគ្នា រវាងបុរស និងស្ត្រីនៅក្នុងសង្គម ។ សំខាន់ជាងនេះទៀត ឆ្លុះបញ្ចាំង និងអបអរសាទរ ចំពោះសមិទ្ធផលទាំងឡាយដែលសម្រេចបានក្នុងការលើកកម្ពស់ការចូលរួមរបស់ស្ត្រីនៅគ្រប់ទិដ្ឋភាពទាំងអស់នៃសង្គម រួមមាន សេដ្ឋកិច្ច សង្គមកិច្ច វប្បធម៌ និងនយោបាយ ។
មានប្រសាសន៍គាំទ្រពីឯកឧត្តម វ៉ា ថន អភិបាលខេត្ត ៖ ក្នុងនាមថ្នាក់ដឹកនាំលើប្រធានបទ “ មានសន្តិភាព មានការលើកកម្ពស់សមភាពយេនឌ័រ ” បានរំលេចពីតម្លៃសុខសន្តិភាព និងអរគុណសន្តិភាព ដែលរាជរដ្ឋាភិបាលកម្ពុជា បាននឹងកំពុងថែរក្សាសន្តិភាពឲ្យនៅគង់វង្សយូរអង្វែងឆ្ពោះទៅមុខទៀត ។
លើសពីនេះទៀត ក្រោមការដឹកនាំប្រកបដោយកិត្តិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រទេសកម្ពុជា បានពង្រឹងកិច្ចសហប្រតិបត្តិការថែរក្សាសុខសន្តិភាព និងស្ថិរភាពនៅលើពិភពលោក និងកិច្ចសហប្រតិបត្តិការជាមួយបណ្តាប្រទេសជិតខាងជាប់ព្រំដែន កសាងតំបន់ព្រំដែន ជាតំបន់សន្តិភាព មិត្តភាព សហប្រតិបត្តិការ និងអភិវឌ្ឍន៍ ។ និងបានចូលរួមចំណែកគាំទ្រកិច្ចការមនុស្សធម៌ ការលើកកម្ពស់សមត្ថភាព ជីវភាពសិទ្ធិ ឋានៈ តួនាទី សុខុមាលភាពស្ត្រី និងការទប់ស្កាត់អំពើហឹង្សា និងដោះស្រាយជម្លោះនានាដោយសន្តិវិធី ។
ឯកឧត្តមបានធ្វើការអំពាវនាវដល់ថ្នាក់ដឹកនាំទាំងអស់ជាស្ត្រី ៖ ត្រូវតែបន្តពង្រឹងសមត្ថភាព នៃការដឹកនាំ គ្រប់គ្រងធ្វើយ៉ាង ណាឲ្យស្ត្រីក្លាយជាអ្នកដឹកនាំដ៍វៃ ឆ្លាត ពោពេញដោយសមត្ថភាព និងត្រូវចូលរួមធ្វើការទប់ស្កាត់ នឹងលុបបំបាត់អំពើហិង្សាលើស្ត្រី ព្រមទាំងដោះស្រាយជម្លោះនានាដោយសន្តិវិធី ។
ក្នុងឱកាសនោះឯកឧត្តម និងលោកជំទាវ បានអញ្ជើញចែកជូននូវអំណោយអនុស្សាវរីយ៍ ជូនដល់បងប្អូនជានារី ដែលបានចូលរួមទាំងអស់នោះផងដែរ៕
