បើទោះបីជា ឯកឧត្តម នាយឧត្តមសេនីយ៍ឯក សៅ សុខា មេបញ្ជាការកងរាជអាវុធហត្ថលើផ្ទៃប្រទេស ដាក់បទបញ្ជាយ៉ាងក្តៅគគុកឲ្យមន្ត្រីក្រោមឱវាទខិតខំបំពេញតួនាទី ចាប់បង្ក្រាបបទល្មើសព្រៃឈើធនធានធម្មជាតិឲ្យខានតែបានជាដាច់ខាតយ៉ាងណាក៏ដោយ ក៏អស់លោកមន្ត្រីគ្រាប់ល្ពៅមួយចំនួននៅក្នុង ខេត្តព្រះវិហារ និងខេត្តឧត្តរមានជ័យ ទាំងនោះនៅតែគ្មានចំណាត់ការណ៍ទប់ស្កាត់ចាប់បង្ក្រាប និងនៅតែបន្តបើកដៃបណ្តោយឲ្យពួកឈ្មួញរកស៊ីដឹកបទល្មើសព្រៃឈើ យ៉ាងគឃ្លើនជារៀងរាល់ថ្ងៃរាល់យប់ដដែល។
ជាក់ស្តែងជារៀងរាល់យប់ស្ត្រីមេឈ្មួញវ័យក្មេងជើងខ្លាំងឈ្មោះ ចែ ញ៉ាញ់ និងកូនចៅ បានធ្វើសកម្មភាពដឹកជញ្ជូនឈើទ្វារអត់ច្បាប់តាមរយៈរថយន្តជាច្រើនគ្រឿងដូចជា ១. រថយន្តម៉ាក កូរ៉េ ពណ៌ស ពាក់ស្លាកលេខ(សៀមរាប 2C-3005) ២. រថយន្តម៉ាក ហ្វ្រន់ធា ពណ៌ស ពីរបាំង ពាក់ស្លាកលេខ(បាត់ដំបង 2B-2795) ៣. រថយន្តម៉ាក តាកូម៉ា មួយបាំងកន្លះ ពណ៌ទឹកប្រាក់ ៤. រថយន្តម៉ាក ម៉ាស្ដា មួយបាំងកន្លះ ពណ៌ប្រផេះ ពាក់ស្លាកលេខ(ខេមរភូមិន្ទ 2-8915) ដឹកឈើទ្វារពេញៗរថយន្ដចេញពីខេត្តព្រះវិហារ ធ្វើដំណើរឆ្លងកាត់ ស្រុកត្រពាំងប្រាសាទ ស្រុកអន្លង់វែង ខេត្តឧត្តរមានជ័យ ឆ្ពោះយកទៅលក់នៅតាមបណ្ដាខេត្តនានាដូចជា ខេត្តបន្ទាយមានជ័យ ខេត្តបាត់ដំបង និងខេត្តសៀមរាប ដោយធ្វើការដឹកជញ្ជូនបានយ៉ាងរលូនគ្មានការរំខានពីសមត្ថកិច្ច និងមន្ត្រីជំនាញពាក់ព័ន្ធនៅគ្រប់មូលដ្ឋានក្នុងខេត្តទាំងពីរនេះឡើយ។
ប្រជាពលរដ្ឋជាច្រើនបានដាក់ការសង្ស័យថា ប្រហែលជាមេឈ្មួញស្រីឈ្មោះ ចែ ញ៉ាញ់ នេះមានការរៀបចំជាកញ្ចប់លុយឲ្យ សមត្ថកិច្ចនិងមន្ត្រីជំនាញចាប់ពីថ្នាក់ស្រុកដល់ថ្នាក់ខេត្ត អស់ហើយក៏មិនដឹង ហើយប្រសិនបើសមត្ថកិច្ចនិងមន្ត្រីជំនាញគ្មានការបើកដៃនិងឃុបឃិតគ្នាជាប្រព័ន្ធនោះទេ គឺមេឈ្មួញស្រីរូបនេះក៏មិនអាចធ្វើការដឹកជញ្ជូនឈើទ្វារអត់ច្បាប់ទាំងនេះ ចេញពីខេត្តព្រះវិហារ ឆ្លងកាត់ខេត្តឧត្តរមានជ័យ ទៅខេត្តផ្សេងៗបានតាមតែអំពើចិត្តនោះឡើយ ព្រោះត្រូវប្រឈមមុខនិងការចាប់បង្ក្រាបជៀសមិនផុតនោះទេ។
ប្រជាពលរដ្ឋជាច្រើនសូមធ្វើការសំណូមពរនិងអំពាវនាវទៅដល់ ប្រមុខរាជរដ្ឋាភិបាលថ្នាក់ដឹកនាំកំពូល និងមន្ត្រីជំនាញថ្នាក់ជាតិទាំងអស់ ជួយទប់ស្កាត់និងធ្វើការបង្ក្រាបចំពោះស្ត្រីមេឈ្មួញជើងខ្លាំងវ័យក្មេងឈ្មោះ ចែ ញ៉ាញ់ នេះផង បើមិនដូច្នោះទេព្រៃឈើក្នុងខេត្តព្រះវិហារ និងខេត្តឧត្តរមានជ័យ ច្បាស់ជារងនូវការ រលាយហិនហោចខ្លោចផ្សាខ្ទេចខ្ទី អស់ជាមិនខានឡើយ ហើយក៏សូមជួយដុះក្អែលមន្ត្រីជំនាញពាក់ព័ន្ធមួយចំនួនទាំងពីរខេត្តនេះចេញផង ព្រោះអស់លោកមន្ត្រីទាំងអស់នេះមិនដែលធ្វើការចាប់បង្ក្រាប បទល្មើសរបស់មេឈ្មួញស្រីឈ្មោះ ចែ ញ៉ាញ់ ទេ បើទោះបីជាមានការរិះគន់ខ្លាំងៗពីសំណាក់ប្រជាពលរដ្ឋ និងការចុះផ្សាយពីសំណាក់ សារព័ត៌មាន និងទូរទស្សន៍ ជាច្រើនលើកច្រើនសាររាប់ឆ្នាំកន្លងមក រហូតមកដល់ក្នុងពេលបច្ចុប្បន្ននេះក៏ដោយ ក៏មន្ត្រីជំនាញគ្រាប់ល្ពៅទាំងនេះមិនខ្វល់ពីការរិះគន់អ្វីទាំងអស់៕
