ខេត្តឧត្ដរមានជ័យ៖ មេឧក្រឹដ្ឋកម្មឈើគ្រញូងជើងខ្លាំងដែលល្បីឈ្មោះបោះសម្លេងជិតមួយទស្សវត្សរ៍ប្រចាំខេត្តឧត្ដរមានជ័យ ឈ្មោះ ង្វៀង ធីម៉ៃ ហៅយាយ ម៉ាយ ដែលបាត់មុខមួយរយៈពេលបន្ទាប់ពីចេញពីពន្ធនាគារកន្លងមកនោះ ស្មានតែកែខ្លួនហើយទៅរស់នៅឯទីណាបាត់ទៅហើយ តាមពិតនៅសម្ងំសោយសុខលួចប្រកបមុខរបររកស៊ីដើរប្រមូលទិញនិងដឹកឈើគ្រញូង និងឈើនាងនួន នៅក្នុងតំបន់ ឃុំអូរស្វាយ ស្រុកត្រពាំងប្រាសាទ ខេត្តឧត្ដរមានជ័យ យ៉ាងកក្រើកដដែលសោះ។
ជាក់ស្ដែងជារៀងរាល់ថ្ងៃស្ត្រីជនជាតិវៀតណាមឈ្មោះ ង្វៀង ធីម៉ៃ ហៅយាយ ម៉ាយ រូបនេះ នៅតែបន្តដើរប្រមូលទិញឈើគ្រញូង និងឈើនាងនួន ផ្ដាច់មុខ នៅតាមតំបន់ជើងភ្នំក្រវាត់ព្រំដែន ដោយដើរប្រមូលទិញតាមគ្រប់ច្រកល្ហក ក្នុងឃុំអូរស្វាយ ស្រុកត្រពាំងប្រាសាទ ដឹកជញ្ជូនដោយរថយន្ដម៉ាក បាឡែន ពណ៌ខ្មៅ ពាក់ស្លាកលេខ (ភ្នំពេញ 2R-4076) និងរថយន្ដម៉ាក បាឡែន ពណ៌ទឹកប្រាក់ ពាក់ស្លាកលេខ (កណ្ដាល 2A-0491) យ៉ាងសកម្មដដែល ដោយមិនរាងចាល់និងមិនកោតខ្លាចញញើតនូវច្បាប់សោះឡើយ ចំណែកអាជ្ញាធរ សមត្ថកិច្ចនិងមន្ត្រីជំនាញ នៅក្នុងមូលដ្ឋានស្រុកត្រពាំងប្រាសាទវិញគឺថា ស្ងាត់បាត់មុខឲ្យសូន្យឈឹង មិនដែលឃើញចុះចាប់បង្ក្រាបរថយន្ដដឹកឈើគ្រញូងរបស់ យាយ ម៉ាយ សោះ សង្ស័យតែត្រូវ យាយ ម៉ាយ រៀបចំសែនព្រេនបិទមាត់បិទកគ្រប់ៗគ្នាអស់ហើយក៏មិនដឹង ទើបបានជាមើលមិនឃើញនិងមិនរវល់ពីសកម្មភាពនៃការដើរទិញ និងការដឹកជញ្ជូនឈើគ្រញូង និងឈើនាងនួន ទាំងឡានៗរបស់យាយ ម៉ាយ ជារៀងរាល់យប់រាល់ថ្ងៃសោះ។
សូមបញ្ជាក់ផងដែរថា មេឈ្មួញឈ្មោះ ង្វៀង ធីម៉ៃ ហៅ យាយ ម៉ាយ រូបនេះ គឺជាឧក្រឹដ្ឋជនឈើគ្រញូងដ៏សាហាវ រាប់ឆ្នាំកន្លងមកហើយ ដោយកន្លងមកធ្លាប់បានបញ្ជាឲ្យកូនចៅរបស់ខ្លួនជាច្រើននាក់ដេញវាយដេញកាប់ ប៉ុនប៉ងសម្លាប់អ្នកសារព័ត៌មាន ដែលបានចុះទៅថតផ្ដិតយករូបភាពបទល្មើសឈើគ្រញូងជាក់ស្ដែងរបស់ឈ្មួញនេះផ្ទាល់ បណ្ដាលឲ្យអ្នកសារព័ត៌មានផិតភ័យរត់ផះក្រញាំ ហើយកូនចៅយាយ ម៉ាយ ទាំងអស់នោះក៏នាំគ្នារត់ដេញតាមវាយរថយន្ដអ្នកសារព័ត៌មានខ្ទេចខ្ទីអស់យ៉ាងដំណំផងដែរ រួចធ្វើការសំរួលដោះស្រាយជាក្រោយ។
មហាជនជាច្រើននៅក្នុងខេត្តឧត្ដរមានជ័យ មានការហួសចិត្តយ៉ាងខ្លាំង ចំពោះរឿងករណីបទល្មើសរបស់មេឈ្មួញ យាយ ម៉ាយ រូបនេះ ហើយក៏មានការងើយឆ្ងល់យ៉ាងខ្លាំងដែរថា តើថ្ងៃណាទើបច្បាប់អាចចាត់ការណ៍មេឈ្មួញឈើគ្រញូងឈ្មោះ យាយ ម៉ាយ ម្នាក់នេះ ឲ្យមានប្រសិទ្ធភាព កុំឲ្យនៅបន្តធ្វើសកម្មភាពនេះបានតទៅទៀត?
ប្រជាពលរដ្ឋជាច្រើនសូមធ្វើការអំពាវនាវទៅដល់ ឯកឧត្ដមនាយឧត្ដមសេនីយឯក សៅ សុខា មេបញ្ជាការកងរាជអាវុធហត្ថលើផ្ទៃប្រទេស សូមឯកឧត្ដមមានចំណាត់ការណ៍ក្ដៅចំពោះមេឈ្មួញវៀតណាមជើងខ្លាំង ឈ្មោះយាយ ម៉ាយ នេះផងទាន ព្រោះមន្ត្រីជំនាញគ្រប់ជាន់ថ្នាក់នៅក្នុងមូលដ្ឋាន ឃុំអូរស្វាយ ស្រុកត្រពាំងប្រាសាទ ខេត្តឧត្ដរមានជ័យ គ្មានអ្នកណាម្នាក់ធ្វើការចុះចាប់បង្ក្រាបបទល្មើសឈើគ្រញូងយាយ ម៉ាយ ឡើយ។