កងកម្លាំងនគរបាលក្រុងប៉ោយប៉ែត និងកម្លាំងការិយាល័យនគរបាលប្រឆាំងគ្រឿងញៀនខេត្ត ក្រោយការដឹកនាំបញ្ជាផ្ទាល់ពីលោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ដោយមានការសម្របសម្រួលនិតិវីច្បាប់ពីលោក មាស ចន្ទ័ពិសិដ្ឋ ព្រះអាជ្ញារងអមសាលាដំបូងខេត្ត កាលពីរសៀលថ្ងៃទី១៨ ខែមិថុនា ឆ្នាំ២០១៩ បានឆ្មក់ចូលបង្ក្រាបឃាត់បានជនសង្ស័យអ្នកលក់ និងអ្នកប្រើប្រាស់គ្រឿងញៀន១៥៥នាក់ ដកហូតបានវត្ថុតាងបានថ្នាំញៀនមួយចំនួនធំ។
យោងតាមរបាយការណ៍របស់ អធិការនគរបាលក្រុងប៉ោយប៉ែត លោក ធិន ស៊ិនដេត បានឲ្យដឹងថាប្រតិបត្តិការបង្ក្រាបនេះ សមត្ថកិច្ចយើងឃាត់បានជនសង្ស័យចំនួន ១៥៥នាក់ ក្នុងនោះអ្នកជួញដូរគ្រឿងញៀន០២នាក់ អ្នកមានថ្នាំញៀនលើខ្លួន ៣នាក់ មេកាប្រុសស្រី ៤នាក់ សន្តិសុខ២នាក់។ ដកហូតបានវត្ថុតាង ថ្នាំប្រភេទគ្រាប់ពណ៌ក្រហមចំនួន ៥៤គ្រាប់ ម្សៅក្រមពណ៌ស ចំនួន ០៥ថង់ ម្សៅម៉ត់ចំនួន០១ថង់តូច ទូបាញ់ត្រី០៨គ្រឿង ស្លុតហ្គេម១៤គ្រឿង ថ្នាំគ្រវី០១គ្រាប់ ត្រួតពិនិត្យទឹកនោម នៅនឹងកន្លែង២២នាក់ ស្រី២នាក់ មានសារធាតុញៀន និងវត្ថុតាងផ្សេងៗមួយចំនួន។
លោក ធិន ស៊ិនដេត បានបន្តថា ការបង្ក្រាបទីតាំងកាស៊ីណូឡាក់គី គឺធ្វើឡើងក្រោយពីមានពលរដ្ឋយុវជនមួយចំនួនប្តឹង និងរាយការណ៍ថា កូនចៅរបស់ពួកគាត់មួយចំនួនទៅលេងល្បែងភ្នាល់បាញ់ត្រី ស្លុត និងជួបជុំមិត្តភក្កិជក់ថ្នាំញៀនទីនោះ។
ក្រោយស្រាវជ្រាវ និងឃាត់ខ្លួនជនសង្ស័យមួយចំនួនមកសួរនាំ ពួកគេបានសារភាពថា ថ្នាំញៀនទិញថ្នាំញៀនពីទីតាំងកាស៊ីណូខាងលើ ទើបសមត្ថកិច្ចយើងឆ្មក់ចូលបង្ក្រាប ឈានដល់ការចាប់ខ្លួនមនុស្សរហូត១៥៥នាក់ និងដកហូតបានថ្នាំញៀនមួយចំនួនធំ។
ពាក់ពន្ធ័ករណីនេះ លោក ង៉េង សុជា ស្នងការរងផែនប្រឆាំងគ្រឿងញៀន នៃស្នងការដ្ឋាននគរបាលខេត្តបន្ទាយមានជ័យ ប្រតិបត្តិការបង្ក្រាបនេះ សមត្ថកិច្ចយើងបានធ្វើកាលពីម៉ោង ៣រសៀលថ្ងៃទី១៨ ខែមិថុនា ឆ្នាំ២០១៩ រហូតដល់ម៉ោង ៣ទាបភ្លឺព្រឹកថ្ងៃទី ១៩ ខែមិថុនា ឆ្នាំ២០១៩ ទើបបញ្ចប់។ ជនសង្ស័យទាំងនោះត្រូវ បានឃាត់ខ្លួនបញ្ជូនតាមរថយន្តសឺរ៉ែន៣គ្រឿង និង២រថយន្តក្រុង យកទៅសួនាំនៅស្នងការដ្ឋាននគរបាលខេត្តដើម្បីសួរនាំ បន្ទាប់ពីពិនិត្យទឹកនោមឃើញមានសារធាតុញៀន។ បច្ចុប្បន្ន ជនសង្ស័យទាំងនោះ កំពុងត្រូវបានឃាត់ខ្លួនបណ្តោះអាសន្ន ដើម្បីសួរនាំកសាងសំណុំរឿង បញ្ជូនទៅតុលាការចាត់ការតាមផ្លូវច្បាប់៕ឆារីយ៉ា
