នាយរងការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តរតនគិរីម្នាក់ ត្រូវបានខ្មាន់កាំភ្លើងបាញ់សម្លាប់ស្លាប់ភ្លាមៗនៅនឹងកន្លែងក្នុងហាងកាហ្វេ ក្រុងបាលុង ខេត្តរតនគិរី។
ករណីដ៏សាហាវនេះបានកើតឡើងនៅវេលាម៉ោងប្រមាណ៩ព្រឹក ថ្ងៃទី៣ ខែតុលា ឆ្នាំ២០១៩នេះ ស្ថិតក្នុងហាងកាហ្វេមួយកន្លែង ភូមិអូរកន្សែង សង្កាត់បឹងកន្សែង ក្រុងបានលុង ខេត្តរតនគិរី។
បើយោងតាមអ្នកឃើញហេតុការណ៍ បានឲ្យដឹងថា នៅមុនពេលកើតហេតុ ពួកគាត់ឃើញរថយន្តហ្វ័ររ៉ែនន័រ ០១គ្រឿងជិះគ្នា ពី៣ទៅ៤នាក់ បើកមកឈប់មុខហាងកាហ្វេ ហើយដើរតំរង់មកជនរងគ្រោះ បាញ់ចំក្បាលតែម្តង រួចរត់ឡើងរថយន្តបើកគេចបាត់។
ជនរងគ្រោះឈ្មោះ ផន ទុំ មានតួនាទីជា នាយរងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តរតនគិរី ។
គួរជម្រាបថាកម្លាំងសមត្ថកិច្ចជំនាញក្រុងបានលុង និងស្នងការនគរបាលខេត្តរតនគិរីកំពុងស្វែងរកចាប់ជនដៃយកមកផ្ដន្ទាទោសតាមផ្លូវច្បាប់៕
