(រតនគិរី)÷ បុរសជនជាតិគ្រឹងម្នាក់បានស្លាប់ៗនៅនិងកន្លែងកើតហេតុ បន្ទាប់ពីជិះម៉ូតូទៅបុកគូទគោយន្តកែច្នែយ៉ាងពេញទំហឹង ខណៈគោយន្តកែច្នៃ១គ្រឿងនេះបែកកង់។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៩និង១៨នាទីយប់ថ្ងៃទី២៥ ខែតុលា ឆ្នាំ២០២០
ត្រង់ចំណុចមុខចម្ការស្វាយចន្ទីឈ្មោះ ធី កាត្រិង ស្ថិតនៅក្នុងភូមិតងណងឡិះ ឃុំអូរជុំ ស្រុកអូរជុំ ខេត្តរតនគិរី។
មន្ត្រីនគរបាលស្រុកអូរជុំបានឲ្យដឹងថា អ្នកបេីកបរគោយន្តកែច្នៃក្រោយកើតហេតុបានរត់គេចខ្លួនបាត់ ហើយត្រូវបានគេស្គាល់ឈ្មោះ អាន់ ឌីណា ភេទប្រុស អាយុ២៥ឆ្នាំជនជាតិខ្មែរ មុខរបរអ្នកបើកបរ មានទីលំនៅភូមិអូររមៀត សង្កាត់ឡាបានសៀក ក្រុងបានលុង ខេត្តរតនគិរី។
រីឯអ្នកបេីកបរម៉ូតូ ឈ្មោះ អាយ៉ាក ខិល ភេទប្រុស អាយុ៣៥ឆ្នាំ ជនជាតិគ្រឹង មុខរបរកសិករ មានទីលំនៅភូមិតងប្លេង ឃុំអូរជុំ ស្រុកអូរជុំ ខេត្តរតនគិរី បែកក្បាលស្លាប់ភ្លាមៗនៅនិងកន្លែងកើតហេតុ ជិះម៉ូតូវ៉េវឆ្លាម១គ្រឿងអត់ស្លាកលេខ រងការខូចខាតផ្នែកខាងមុខយ៉ាងដំណំ។
មន្ត្រីនគរបាលបានឲ្យដឹងទៀតថា មុនពេលកើតហេតុគោយន្តកែច្នៃបានបែកកង់មុខខាងស្ដាំ ឈប់នៅអែបចិញ្ចើមផ្លូវមិនបានដាក់ជាសញ្ញាសម្គាល់ឲ្យអ្នកធ្វើដំណើរបានដឹងនោះឡើយ ទើបមានបញ្ហាគ្រោះថ្នាក់បណ្តាលឲ្យមនុស្សស្លាប់បែបនេះ។
ដោយអ្នកបើកបរម៉ូតូមិនបានចាប់អារម្មណ៍ថាមានគោយន្តនៅពីមុខខ្លួននោះទេ ទើបជិះម៉ូតូទៅបុកគោយន្តកែច្នៃពីក្រោយយ៉ាងពេញទំហឹង បណ្ដាលឲ្យស្លាប់នៅនឹងកន្លែងកើតហេតុ។
ក្រោយកើតហេតុកម្លាំងសមត្ថកិច្ចមូលដ្ឋានចុះមកទកន្លែងកើតហេតុនិងបានធ្វើការវាស់វែង រឹបអូសយកមធ្យោបាយទាំង២គ្រឿងទៅរក្សាទុកនៅអធិការដ្ឋាននគរបាលស្រុកអូរជុំ ដើម្បីរង់ចាំធ្វើការសម្របសម្រួលគ្នានៅពេលក្រោយ។
ដោយឡែកសពជនរងគ្រោះត្រូវបានសមត្ថកិច្ចជំនាញធ្វេីលិខិតប្រគល់ទៅឲ្យបងប្អូនយកទៅធ្វើបុណ្យតាមប្រពៃណី។
សូមបញ្ជាក់ផងដែរថា គោយន្តកែច្នៃគ្រប់ប្រភេទបើកបរនៅលើដងផ្លូវជាតិពេលយប់ ពុំមានបច្ចេកទេសគ្រប់គ្រាន់ ពោល ភ្លើងស្តុបនៅខាងក្រោយ ឬភ្លើងចង្គៀងខាងមុខ មានតែម្ខាងធ្វើឲ្យអ្នកជិះម៉ូតូមិនចាប់អារម្មណ៍ថាម៉ូតូ តាមការពិតគោយន្តសោះ ទើបបណ្តាលឲ្យមានគ្រោះថ្នាក់ដោយជាយថាហេតុ៕