(រតនគិរី)៖ដោយអនុវត្តន៍តាមបទបញ្ជាដ៏ម៉ឹងម៉ាត់របស់នាយឧត្តមសេនីយ៍សៅ សុខាមេបញ្ជាការអាវុធហត្ថលើផ្ទៃប្រទេសនិងជាប្រធានគណៈកម្មាការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ,កម្លាំងអាវុធហត្ថមូលដ្ឋានស្រុកអូរយ៉ាដាវនៅព្រឹកថ្ងៃទី១៨ខែកក្កដាឆ្នាំ២០១៩នេះបានស្ទាក់ចាប់រថយន្តឡង់គ្រីស័រព៌ណខ្មៅ១គ្រឿងពាក់ស្លាកលេខរតនគិរី២A-០១៤៩ដឹកឈើពេញត្រង់ចំណុចនិយាមកា(០៧៦០៣២៤-១៥១៨៥៥៦)ក្នុងភូមិសាស្ត្រភូមិសោមធំឃុំសោមធំស្រុកអូរយ៉ាដាវខេត្តរតនគិរី។ លោកវរសេនីយ៍ត្រីសុខ មីនមេបញ្ជាការអាវុធហត្ថមូលដ្ឋានស្រុកអូរយ៉ាដាវបានប្រាប់ភ្នាក់ងារទូរទស្សន៍ប៉ុស្តិ៍លេខ8HDនៅរសៀលថ្ងៃដដែល(១៨កក្កដា)នេះថាក្នុងពេលប្រតិបត្តិការនោះអ្នកបើករថយន្តដឹកបទល្មើសរត់គេចខ្លួនបាត់ហើយកម្លាំងនាំវត្ថុតាងមករក្សាទុកនៅសង្កាត់រដ្ឋបាលព្រៃឈើអូរយ៉ាដាវរួចធ្វើការវាស់វែងឃើញឈើធ្នង់ចំនួន៩៩៧គីឡូក្រាមស្មើនឹង០,៧៣៨ម៉ែត្រគូប។ លោកវរសេនីយ៍ត្រីសុខ មីនប្រាប់បន្តថាឈើធ្នង់ខាងលើប្រគល់ឲ្យរដ្ឋបាលព្រៃឈើចាត់ចែងបន្ត,មធ្យោបាយដឹកបទល្មើសក្រោមបទបញ្ជាលោកឧត្តមសេនីយ៍ត្រីថាវ យ៉េនមេបញ្ជាអាវុធហត្ថខេត្តនិងមានការសម្របសម្រួលពីលោករ៉ា បូរ៉ាន់ឌីព្រះរាជអាជ្ញារងអមសាលាដំបូងខេត្តរតនគិរីបានធ្វើការបំផ្លាញចោលនៅរសៀលថ្ងៃទី១៨ខែកក្កដាឆ្នាំ២០១៩នេះ។ សូមបញ្ជាក់ផងដែរថានេះជាលើកទី២ហើយដែលកម្លាំងអាវុធហត្ថស្រុកអូរយ៉ាដាវដុតបំផ្លាញរថយន្តដឹកបទល្មើសឈើ,កាលពីព្រលប់ថ្ងៃទី១២ខែកក្កដាឆ្នាំ២០១៩កន្លងទៅបានដុតបំផ្លាញរថយន្តឡង់គ្រីស័រច្នៃ២គ្រឿងដូច្នេះសរុបទាំងអស់មធ្យោបាយដឹកឈើបាន៣គ្រឿងហើយ៕គឹមសុវណ្ណរិទ្ធ
